Si trajtohet mosha e tretë në Gjermani! Flet mjekja geriatre Dr. Erifili Tili!
E Martë 2 Dhjetor 2025, 20:08
Dritare.net
Në një intervistë për emisionin Shqip me gazetaren Rudina Xhunga në DritareTV, mjekja geriatre dr, Erifili Tili flet për geriatrinë, mjekësia e moshave të treta që shumë pak njihet si term në Shqipëri dhe është e fokusuar në trajtimin klinik të pacientëve të moshuar, ndërsa gerontologjia është shkenca që studion procesin e plakjes në aspektin biologjik dhe social.
Dr. Tili, e cila jeton në landin e Bavarisë dhe punon në një qendër rehabilitimi pranë Ulmit, detajon strukturën e sofistikuar të kujdesit passpitalor në Gjermani. Ajo përshkruan një sistem ku pacienti nuk hidhet në rrugë menjëherë pas përfundimit të trajtimit akut në spital. 'Plakja është biologjike,' thotë ajo, 'por në praninë e sëmundjeve, i moshuari ka nevojë për ndihmë mjekësore të vazhdueshme.' Këtu hyn në lojë roli jetik i qendrave të rehabilitimit. Ndryshe nga Shqipëria, ku pas një operacioni apo sëmundjeje të rëndë si tromboza apo problemet kardiake, pacienti kthehet në shtëpi për t'u kujdesur nga familjarët, në Gjermani ekziston një hallkë e ndërmjetme e domosdoshme.
Qendra ku punon Dr. Tili shërben si një urë midis spitalit dhe shtëpisë. Ajo shpjegon se dy spitale furnizojnë qendrën e tyre me pacientë që kanë kaluar fazën akute por nuk janë ende gati për t'u vetëshërbyer. Qëllimi është rikthimi i funksionalitetit sa më afër gjendjes para sëmundjes. Ajo jep shembullin e një frakture të thjeshtë: nëse një i moshuar thyen krahun ose këmbën, ai shkon në rehabilitim për të mësuar si të funksionojë me gjymtyrën e dëmtuar ose si ta riaftësojë atë, në mënyrë që kur të kthehet në shtëpi, të mos jetë një barrë totale për veten dhe të tjerët.
Ky sistem tregon një diferencë thelbësore në filozofinë e trajtimit: ndërsa në Shqipëri fokusi është vetëm te mbijetesa e momentit (ndërhyrja kirurgjikale, mjekimi akut), në Gjermani fokusi është te cilësia e jetës pas ndërhyrjes. Dr. Tili nënvizon se në këtë proces nuk është vetëm mjeku geriatër, por një ekip multidisiplinar që përfshin fizioterapistë dhe punonjës socialë. Këta të fundit luajnë një rol kyç në përgatitjen e terrenit për kthimin e pacientit në shtëpi, duke vlerësuar nëse shtëpia është e përshtatshme dhe kush do të kujdeset për të. Kjo qasje holistike mungon pothuajse tërësisht në realitetin shqiptar, ku familja lihet e vetme për të menaxhuar situata komplekse mjekësore pa asnjë mbështetje institucionale./dritare.net
