Riatdhesohen nga Siria 5 shtetas shqiptarë, mes tyre dy gra dhe tre fëmijë
Wednesday 26 August 2026, 09:09
Dritare.net
Pesë shtetas shqiptarë, mes tyre dy gra dhe tre fëmijë, janë riatdhesuar nga Siria dhe kanë mbërritur në Tiranë pak pas mesnatës së 26 gushtit.
Operacioni për kthimin e tyre në Shqipëri u përmbyll pas një procesi të gjatë koordinimi mes institucioneve shqiptare, përfaqësive diplomatike dhe konsullore shqiptare, si dhe autoriteteve të vendeve të përfshira.
Ministria për Evropën dhe Punët e Jashtme njoftoi se bëhet fjalë për një riatdhesim vullnetar, ndërsa theksoi se kthimi i shtetasve nga zonat e prekura nga konflikti është pjesë e përgjegjësisë së shtetit për mbrojtjen e qytetarëve të tij.
Pas mbërritjes në Shqipëri, pesë të riatdhesuarit do t’i nënshtrohen kontrolleve shëndetësore dhe vlerësimeve psikosociale. Në vijim do të nisë procesi i akomodimit, rehabilitimit dhe riintegrimit të tyre në shoqëri.
“Riatdhesimi i shtetasve shqiptarë nga zona të prekura nga konflikti është shprehje e përgjegjësisë së shtetit për mbrojtjen e qytetarëve të vet, edhe në rrethana të vështira dhe komplekse”, thuhet në njoftimin e Ministrisë së Jashtme.
Institucionet përgjegjëse do të vijojnë të ofrojnë asistencën e nevojshme për pesë shtetasit, ndërsa do të koordinojnë edhe hapat e mëtejshëm për integrimin e tyre./K.C/dritare.net
