Publikohen audiot që zbulojnë komunikimet para aksidentit tragjik të trenave në Spanjë
Thursday 29 October 2026, 19:07
Dritare.net
Regjistrime audio të publikuara nga mediat spanjolle kanë zbuluar komunikimet mes drejtuesve të trenave dhe qendrës së kontrollit, vetëm pak minuta para aksidentit tragjik të së mërkurës, ku humbën jetën 69 persona.
Autoritetet po hetojnë shkaqet e përplasjes, e cila ndodhi kur një tren që udhëtonte nga Madridi drejt Seviljes u përplas me një tren tjetër që qëndronte i ndaluar në shina.
Tri regjistrime audio, të publikuara nga disa media, përfshirë El País dhe RTVE, duket se tregojnë se njërit prej trenave iu dha leje të vazhdonte udhëtimin, megjithëse një tren tjetër kishte mbetur i bllokuar në shina, rreth 25 kilometra më përpara.
Kryeministri spanjoll, Pedro Sánchez, është zotuar se autoritetet do të hetojnë çdo detaj të tragjedisë.
Komunikimet pak minuta para përplasjes
Sipas regjistrimeve, një operator i qendrës së kontrollit komunikon me drejtuesin e trenit të kompanisë shtetërore Renfe, i cili po përballej me probleme teknike.
Pas disa shkëmbimeve, operatori i kërkon drejtuesit të vazhdojë udhëtimin dhe të ndjekë sistemin alternativ të sinjalizimit, duke ruajtur shpejtësinë normale.
“Vazhdo udhëtimin dhe më pas ndiq sinjalizimin anësor, me shpejtësi normale dhe në funksionim normal”, dëgjohet t’i thotë operatori drejtuesit.
“Me shpejtësi normale?”, pyet ky i fundit.
“Po”, përgjigjet operatori.
Sistemi i sinjalizimit anësor përdoret si alternativë kur sistemi automatik i sinjalizimit ose transmetimit të të dhënave nuk funksionon.
Ndërkohë, në një tjetër regjistrim dëgjohet drejtuesi i trenit të kompanisë private Iryo, i cili njofton qendrën se treni ka humbur komunikimin me sistemin e kontrollit dhe nuk mund të lëvizë.
“Treni është i ndaluar përpara sinjalit hyrës në Urda”, dëgjohet të thotë ai.
Pas disa komunikimeve, drejtuesit i kërkohet të rifillojë udhëtimin normalisht. Por në një telefonatë të mëvonshme, ai njofton sërish se nuk mund të niset, pasi sistemi i sigurisë nuk i lejon të kontrollojë trenin.
Ky komunikim sugjeron se qendra e kontrollit ishte njoftuar se treni Iryo vazhdonte të qëndronte i ndaluar ndërsa treni Renfe po afrohej.
Kompania Iryo deklaroi se vagonët e trenit të saj u goditën nga pas nga treni tjetër.
Ministri spanjoll i Transportit, Óscar Puente, e cilësoi të mërkurën si “të pashpjegueshëm” vendimin për t’u dhënë trenave urdhër të rifillonin lëvizjen pa kufizime shpejtësie.
Dy trena me qindra pasagjerë
Treni i kompanisë shtetërore Renfe kishte 397 pasagjerë në bord, ndërsa treni i kompanisë private Iryo transportonte 147 persona.
Sipas raportimeve, një problem në sistemin automatik të sinjalizimit, i lidhur me një defekt kompjuterik, kishte detyruar të gjithë trenat në segmentin e prekur të ndalonin.
Megjithatë, më vonë, trenit Renfe iu dha urdhër të vazhdonte udhëtimin, pavarësisht problemit të raportuar.
Përplasja shkaktoi dhjetëra të plagosur. Të mbijetuarit kanë rrëfyer skena të rënda, me pasagjerë që bërtisnin e gjakoseshin, njerëz të bllokuar në sedilje, persona me gjymtyrë të dëmtuara rëndë dhe tym që mbushte vagonët. Njëri prej tyre mori flakë.
Të enjten, mbreti Felipe VI dhe mbretëresha Letizia vizituan disa prej të plagosurve në një spital në Toledo. Më pas, mbreti shprehu ngushëllimet për familjet e viktimave dhe u zotua se hetimi do të përcaktojë shkaqet e aksidentit dhe masat që duhen marrë për të parandaluar tragjedi të ngjashme.
Aksidenti konsiderohet ndër katastrofat më të rënda hekurudhore në historinë moderne të Evropës dhe më i rëndi në Spanjë që prej vitit 2013. Të enjten, vendi nisi tri ditë zie kombëtare.
Reagime politike pas publikimit të audios
Publikimi i regjistrimeve ka shkaktuar reagime edhe në politikën spanjolle. Alberto Ibáñez, deputet i platformës së majtë Sumar, i cilësoi ato si “të neveritshme” në një reagim në rrjetin social X.
Ndërsa Irene Montero, kandidate për kryeministre e partisë Podemos, paralajmëroi se përgjegjësia për aksidentin nuk duhet t’i ngarkohet vetëm një punonjësi. Ajo tha se drejtuesit e trenave dhe ekspertët kanë paralajmëruar prej vitesh për pasojat e liberalizimit të sektorit hekurudhor.
Nga vendi i aksidentit, kryeministri Pedro Sánchez deklaroi se qeveria po punon pa ndërprerje për të mbështetur familjet e viktimave dhe për të zbardhur të gjitha rrethanat e ngjarjes.
“Po punojmë ditë e natë, jo vetëm për të mbështetur familjet e viktimave, por edhe për të përcaktuar çdo detaj të kësaj tragjedie dhe për të forcuar masat e sigurisë, në mënyrë që të mos ndodhë më kurrë”, tha Sánchez.
Shumica e politikanëve spanjollë kanë anuluar aktivitetet publike dhe kanë pezulluar fushatën përpara zgjedhjeve të parakohshme të 29 nëntorit. Përjashtim ka bërë partia e ekstremit të djathtë Vox. Kreu i saj, Santiago Abascal, deklaroi se partia nuk do të marrë pjesë në atë që ai e përshkroi si përpjekje për të “përdorur zinë për të heshtur kritikat” ndaj infrastrukturës hekurudhore të vendit.
Hetimi pritet të përcaktojë se përse u lejua rifillimi i lëvizjes së trenave, pavarësisht problemeve të raportuara me sinjalizimin dhe faktit se njëri prej tyre vijonte të ishte i ndaluar në shina./dritare.net
