Trump shpërthen ndaj NATO-s: Na lanë vetëm në luftë
E Enjte 9 Prill 2026, 10:10
Dritare.net
Presidenti i Shteteve të Bashkuara, Donald Trump, ka sulmuar sërish aleancën ushtarake NATO, duke e akuzuar për mungesë mbështetjeje gjatë konfliktit të fundit me Iranin.
Deklaratat e tij erdhën menjëherë pas një takimi privat në Shtëpinë e Bardhë me Sekretarin e Përgjithshëm të NATO-s, Mark Rutte. Në një postim në rrjetin e tij Truth Social, Trump shkroi:
“NATO nuk ishte aty kur kishim nevojë për ta dhe nuk do të jetë as në të ardhmen.”
Takimi mes dy liderëve zgjati mbi dy orë, megjithatë detajet mbeten të paqarta. Rutte e përshkroi bisedën si “shumë të hapur” dhe “të sinqertë”, duke pranuar se kishte mospajtime të qarta mes palëve.
Përpara takimit, Trump kishte hedhur idenë e tërheqjes së SHBA-ve nga aleanca 32-anëtarëshe, pas refuzimit të disa vendeve të NATO-s për të mbështetur përpjekjet amerikane në hapjen e ngushticës së Hormuzit, një rrugë kyçe për transportin global të naftës.
Sipas Shtëpisë së Bardhë, NATO “u testua dhe dështoi”. Zëdhënësja Karoline Leavitt deklaroi se vendet aleate “u kthyen shpinën amerikanëve”, pavarësisht mbështetjes financiare që SHBA u ofron për mbrojtjen e tyre.
Nga ana tjetër, Rutte theksoi se situata është më komplekse. Ai argumentoi se shumica e vendeve evropiane kanë ndihmuar me baza ushtarake, logjistikë dhe leje fluturimi, duke e quajtur situatën “një tablo me nuanca”.
Megjithatë, mbetet e paqartë nëse këto argumente do të mjaftojnë për të bindur Trump të ruajë angazhimin e SHBA ndaj NATO-s. Presidenti amerikan ka shprehur vazhdimisht pakënaqësi ndaj aleatëve, duke përmendur edhe çështje të tjera si ajo e Groenlandës.
Ndërkohë, tensionet janë rritur ndjeshëm pas operacionit ushtarak amerikan kundër Iranit, i njohur si “Operation Epic Fury”, duke e vendosur aleancën përballë një prej sfidave më të mëdha në historinë e saj.
Megjithatë, një vendim i Kongresit amerikan në fund të vitit 2023 e kufizon fuqinë e presidentit për t’u tërhequr nga NATO pa miratimin e dy të tretave të Senatit ose një akt të posaçëm të Kongresit.
Situata mbetet e tensionuar dhe e pasigurt, ndërsa marrëdhëniet mes SHBA-ve dhe aleatëve të saj tradicionalë po kalojnë një periudhë të vështirë./L.F-dritare.net
