Trump sulmon OKB-në dhe liderët botërorë: Fjalët boshe nuk i zgjidhin luftërat
E Martë 23 Shtator 2025, 19:07
Dritare.net
Presidenti i Shteteve të Bashkuara, Donald Trump, mbajti të martën një fjalim të ashpër para Asamblesë së Përgjithshme të Kombeve të Bashkuara, duke kritikuar ashpër këtë organizatë ndërkombëtare dhe duke lavdëruar punën e administratës së tij. Në përvjetorin e 80-të të OKB-së, Trump e akuzoi atë se ka dështuar të mbështesë përpjekjet e SHBA-së për të ndërmjetësuar marrëveshje paqeje midis shteteve të përfshira në konflikte, duke thënë se organizata “nuk po arrin as afër potencialit të saj”.
Në fjalimin e tij, Trump theksoi se OKB-ja ka “një potencial të jashtëzakonshëm”, por ajo shpeshherë ofron vetëm “fjalë” pa veprime konkrete. Ai shtoi se: “Fjalët boshe nuk zgjidhin luftërat. Vetëm veprimi mund të zgjidhë luftërat dhe konflikte.” Presidenti kritikoi gjithashtu politikat e migracionit dhe energjisë të disa vendeve evropiane, duke i akuzuar se po shkatërrojnë shoqëritë perëndimore. Ai tha: “Vendet tuaja po shkatërrohen. Po shkatërrohen nga brenda.” Në lidhje me klimën, Trump e quajti ndryshimin e klimës “një mashtrim të madh” dhe kritikoi investimet në energjinë e rinovueshme, duke argumentuar se ato do të çojnë në pasoja ekonomike negative.
Në një moment më të lehtë, Trump bëri një batutë për problemet teknike gjatë fjalimit, duke thënë: “Nuk më shqetëson, sepse në këtë mënyrë flas më shumë nga zemra”. Pavarësisht kritikave të ashpra, ai shprehu mbështetje për OKB-në, duke thënë se SHBA-ja është “100% mbështetëse” e saj, por kërkoi që organizata të veprojë më konkretisht për të arritur paqen dhe sigurinë globale.
Fjalimi i Trump para Asamblesë së Përgjithshme të OKB-së shënoi një kthesë të dukshme nga administrata e mëparshme, duke rikthyer një qasje më të ashpër dhe nacionaliste në politikën e jashtme të SHBA-së./K.C/dritare.net
