Në ambientet e Akademisë së Shkencave, sot u mbajtën homazhet e fundit për Artan Lamen, i cili u nda nga jeta në moshën 58-vjeçare, pas një ndërhyrjeje në zemër në Mynih. Një dhimbje e papritur për të gjithë ata që e kanë njohur si mik, koleg, njeri pasionant dhe kontribuues të palodhur për kulturën dhe trashëgiminë shqiptare.
Dhjetëra personalitete nga politika, kultura dhe jeta publike morën pjesë për t’i dhënë lamtumirën e fundit – mes tyre Elisa Spiropali, Blendi Gonxhja, Ulsi Manja, Ervin Hoxha dhe shumë të tjerë.
Artan Lame ishte shumë më tepër se një funksionar publik. Ai ishte publicist, opinionist dhe studiues i përkushtuar i historisë shqiptare. Ai jetoi me pasionin për të mbrojtur dhe promovuar trashëgiminë kulturore të vendit, duke lënë gjurmë si pjesë e shoqërisë civile dhe në rolin e tij si drejtues publik.
Në fjalën e tij, miku i tij Auron Tare u shpreh:
“Njerëz si Lamja janë të rrallë. Ata që kërkojnë ta përmirësojnë kulturën dhe shoqërinë shqiptare, e jo të bëhen pjesë e hipokrizisë. Lame ishte i ndarë mes dy botëve: për shumë ishte një funksionar, por ata që i qëndronin pranë e njihnin pasionin e tij për trashëgiminë.”
Edhe botuesi Fatmir Toçi vuri në pah ndershmërinë e rrallë të Lames, duke thënë:
“Rrallëkush do t’u kthehet për t’iu bërë edhe një herë.”
Ndërsa Artan Shkreli e përmbylli me fjalë të ndjera:
“Sot nuk po ndahemi vetëm nga një mik i afërt, por nga një pjesë e vetes sonë. Lamja ishte unik. Kolonjar krenar./E.P-dritare.net
