Ditën e hënë pritet që të rinisë procesi mësimor, pasi ai është pezulluar që nag 26 nëntori, pas tërmetit shkatërrues.
Por, edhe pse të hënën pritet të hapen shkollat në qarqet ku është shpallur gjendja e jashtëzakonshme, janë rreth 30 shkolla që nuk do të hapen.
Zv/ministrja e Arsimit Lorena Haxhiu, e ftuar në studion e lajmeve në RTV Ora tha se janë marrë të gjitha masat që nxënësit të transportohen në shkolla të tjera, duke filluar nga pikat e grumbullimit deri tek shpenzimet, të cilat do të mbulohen nga buxheti i ministrisë.
” Janë mbi 30 shkolla që nuk do të hapen ditën e hënë, por për secilën prej tyre është marrë masa e nevojshme për zhvendosjen në shkollat pritëse, ku do të priten si turni i pasdites në rastet kur është e nevojshme dhe shkollat kanë kapacitet të plotë të nxënësve të tyre dhe në turnin e parë atëherë kur shkolla i ofron kapacitet e mjaftueshme. Plani i zhvendosjes është mëse i plotë. Ne kemi marrë masat përmes drejtuesve të shkollave dhe mësuesve që kanë qenë në kontakt të drejtpërdrejtë me prindërit që secili nga prindërit të jetë i informuar se ku do të jetë pika që është caktuar për transportin. Transporti mësë tepërmi është parë i nevojshëm në zonat rurale. Me nisjen e procesit mësimor edhe në zonat e prekura nga data 5 dhjetor e kemi parë që ky plan zhvendosje përmes transportit të ofruar nga zyra arsimore dhe të buxhetuar në buxhetin e ministrisë së Arsimit ka funksionuar mësë miri.”-tha Zëvendësministrja./ I.M-Dritare.net
