Pse vallëzimi mund të jetë më i fuqishëm se antidepresivët!
E Martë 10 Shkurt 2026, 13:01
Dritare.net
Në një pistë vallëzimi, gjithçka duket si festë: ritmi arrin 128 rrahje në minutë, trupat lëvizin në sinkron. Por për neuroshkencëtarët, kjo nuk është vetëm argëtim është një formë e fuqishme terapie.
“Vallëzimi është një gjuhë e trupit”, shpjegon Julia F. Christensen, neuroshkencëtare në Institutin Max Planck për Estetikë Empirike dhe autore e librit “Vallëzimi është ilaçi më i mirë”. Sipas saj, truri i njeriut i interpreton lëvizjet e vallëzimit si një formë shprehjeje emocionale, një mënyrë për të komunikuar ndjenja që shpesh nuk mund të thuhen me fjalë.
Studimi që tërhoqi vëmendjen e shkencëtarëve
Interesi për efektet e vallëzimit është rritur pas një meta-analize të publikuar në vitin 2024 në The BMJ, e cila analizoi 218 studime klinike. Rezultatet treguan se vallëzimi uli simptomat e depresionit më shumë se ecja, joga, stërvitja e forcës dhe madje edhe disa trajtime standarde antidepresive.
Michael Noetel, profesor në Universitetin e Queensland dhe autor kryesor i studimit, thekson se kombinimi i aktivitetit fizik, muzikës dhe ndërveprimit social është çelësi i këtij efekti. Megjithatë, studiuesit paralajmërojnë se nevojiten më shumë kërkime në shkallë të gjerë për ta konsideruar vallëzimin një trajtim më vete.
Pse truri reagon kaq fort ndaj vallëzimit
Shkencëtarët shpjegojnë se vallëzimi aktivizon një “simfoni neurokimike” në tru:
dopamina çlirohet kur parashikojmë ritmin e muzikës,
endorfinat rriten nga lëvizja fizike,
oksitocina shtohet kur vallëzojmë me të tjerët.
Ky kombinim përmirëson humorin, ul stresin dhe forcon lidhjet shoqërore. Në studime është vërejtur edhe një fenomen i quajtur “sinkronia ndërtrurinore”, ku aktiviteti i trurit të njerëzve që lëvizin në grup fillon të harmonizohet, duke rritur ndjenjën e besimit dhe përkatësisë.
Një mënyrë për të rikthyer lidhjen me veten
Depresioni shpesh shoqërohet me ulje të shprehjes emocionale dhe të lëvizjes. Vallëzimi, sipas studiuesve, ndihmon në aktivizimin e rrugëve emocionale dhe shqisore, duke rikthyer ndjenjën e lidhjes me trupin dhe me të tjerët.
“Truri i njeriut ka nevojë për njerëz të tjerë përreth tij për të qëndruar i shëndoshë fizikisht dhe mendërisht”, thotë Christensen. Vallëzimi, shton ajo, u jep njerëzve mundësinë të përpunojnë emocionet pa qenë e nevojshme t’i shprehin me fjalë.
Fuqia e vallëzimit në komunitet
Historikisht, vallëzimi ka shërbyer jo vetëm për festë, por edhe për shërim dhe solidaritet. Studiuesit kujtojnë se edhe skena e muzikës house dhe techno në Detroit në vitet ’80 u bë një hapësirë ku komunitetet gjenin gëzim dhe mbështetje në kohë të vështira.
Sot, programe të bazuara në vallëzim po përdoren në terapi dhe kujdes social. Në Mbretërinë e Bashkuar, shërbimi shëndetësor NHS ofron klasa vallëzimi për të moshuarit me demencë, ndërsa studime në Australi tregojnë se programet e strukturuara të vallëzimit përmirësojnë shëndetin mendor dhe funksionin njohës në të gjitha grupmoshat.
Një terapi që sjell gëzim
Ndryshe nga shumë trajtime që fokusohen vetëm në menaxhimin e simptomave, vallëzimi krijon momente gëzimi dhe vetëshprehjeje. Studiuesit thonë se rezultatet më të mira vijnë kur vallëzimi shoqërohet me muzikë, dhe ndërveprim social.
Ekspertët theksojnë se ekzistojnë qindra stile vallëzimi dhe secili mund të gjejë mënyrën e vet për të lëvizur. Dhe ndërsa shkenca vazhdon të studiojë efektet e tij, një gjë duket gjithnjë e më e qartë: vallëzimi nuk është vetëm argëtim për shumë njerëz, është një mënyrë për t’u shëruar. / dritare.net
