Francë/ Protestat për koston e jetesës përfundojnë në kaos, 1,800 të arrestuar dhe 150 policë të plagosur
Sunday 18 October 2026, 12:12
Dritare.net
Franca është zgjuar mes makinave të djegura, vitrinave të thyera dhe dyqaneve të plaçkitura, pas protestave që të shtunën u përshkallëzuan në trazira të dhunshme në Paris dhe qytete të tjera të vendit.
Rreth 550 mijë demonstrues dolën në rrugë për të kundërshtuar rritjen e çmimeve të karburanteve, koston e jetesës dhe përkeqësimin e shërbimeve publike, përfshirë arsimin. Ndonëse pjesa më e madhe e protestave ishte paqësore, grupe personash të maskuar u përfshinë në akte dhune, zjarrvënie dhe grabitje.
Sipas autoriteteve, policia arrestoi rreth 1,800 persona, ndërsa kryeministri francez, Sébastien Lecornu, deklaroi se 150 efektivë policie u plagosën gjatë trazirave.
Në Paris, protestuesit u përleshën me policinë, e cila përdori gaz lotsjellës dhe ujë me presion për të shpërndarë turmat. U dogjën automjete dhe ndërtesa, ndërsa të paktën një restorant u shkatërrua nga zjarri. Grabitje u raportuan edhe në qytete të tjera, përfshirë Marsejën dhe Lilën.
Në Marsejë, persona të përfshirë në trazira hynë me forcë në bashkinë e qytetit, duke përdorur një gardh metalik si mjet për të thyer hyrjen. Në Lilë, një restorant McDonald's u përfshi nga flakët, ndërsa një dyqan i Apple u sulmua dhe u grabit.
Dëme të rënda u raportuan edhe në qytete të tjera franceze. Në Lion, zjarri përfshiu zyrën turistike të qytetit, ndërsa në Limoges, flakët në ndërtesën e bashkisë shkaktuan shembjen e një pjese të saj. Kryebashkiaku i Lionit, Grégory Doucet, e cilësoi djegien e zyrës turistike si një tragjedi për qytetin.
Të dielën në mëngjes, banorët dhe tregtarët nisën pastrimin e rrugëve nga xhamat e thyer dhe mbetjet e djegieve. Vitrinat e disa markave të njohura, përfshirë Ralph Lauren, Gucci dhe Versace, ishin shkatërruar, ndërsa muret e dyqaneve ishin mbuluar me grafite me mesazhe kundër të pasurve.
Protestat studentore në Francë kanë vijuar prej fundit të muajit të kaluar. Përveç kundërshtimit të kostos së jetesës, studentët kërkojnë më shumë investime në arsim, më shumë mësues dhe personel, si dhe përmirësimin e kushteve në shkolla.
Megjithatë, pronarë biznesesh të prekura nga grabitjet kanë deklaruar se autorët shfrytëzuan protestat për të vjedhur, pa pasur lidhje me kërkesat e demonstruesve.
Ministria e Brendshme franceze i përshkroi incidentet si akte të synuara dhune të kryera nga persona të maskuar në disa qytete të vendit./dritare.net
