Putin reagon pas kërcënimit bërthamor: Macron e ka harruar atë që i ndodhi Napoleonit
E Enjte 6 Mars 2025, 19:07
Dritare.net
Rusia paralajmëroi të enjten presidentin francez Emmanuel Macron që të mos e kërcënojë atë me retorikë bërthamore dhe përjashtoi propozimet evropiane për të dërguar forca paqeruajtëse nga anëtarët e NATO-s në Ukrainë.
Macron tha në një fjalim drejtuar kombit të mërkurën se Rusia është një kërcënim për Evropën, Parisi mund të diskutojë shtrirjen e ombrellës bërthamore për aleatët dhe se ai do të mbajë një takim të shefave të ushtrisë nga vendet evropiane që janë të gatshëm të dërgojnë trupa paqeruajtëse në Ukrainë pas një marrëveshjeje paqeje.
"Rusia kurrë nuk do të heqë dorë nga ajo që është e saj," kështu deklaroi presidenti rus Vladimir Putin në një takim me punonjësit dhe përfituesit e Fondacionit Mbrojtësit e Atdheut.
"Ne nuk kemi nevojë për asgjë që i përket të tjerëve, por nuk do të heqim dorë nga ajo që është e jona. Ka njerëz në botë që duan të kthehen në kohët e fushatës së Napoleonit, por ata harrojnë se si përfundoi. Të gjitha gabimet e armiqve tanë filluan këtu: nënvlerësimi i karakterit të popullit rus.," tha më tej Vladimir Putin.
Më herët, ministri i Jashtëm rus Sergei Lavrov gjithashtu e krahasoi Macron me Napoleonin dhe Hitlerin: “Ndryshe nga paraardhësit e tyre, të cilët gjithashtu donin të luftonin kundër Rusisë, Napoleonit, Hitlerit, zoti Macron nuk vepron me shumë hijeshi, sepse të paktën ata e thanë troç: “Duhet të pushtojmë Rusinë, duhet ta mposhtim Rusinë”.
Pushtimi rus i Ukrainës ka çuar në konfrontimin më të madh midis Perëndimit dhe Rusisë që nga kriza e raketave Kubane e vitit 1962, dhe Kremlini dhe Shtëpia e Bardhë kanë thënë se hapat e gabuar mund të shkaktojnë Luftën e Tretë Botërore. Rusia dhe Shtetet e Bashkuara janë fuqitë më të mëdha bërthamore në botë, me mbi 5000 koka bërthamore secila. Kina ka rreth 500, Franca ka 290 dhe Britania 225, sipas Federatës së Shkencëtarëve Amerikanë./K.C/dritare.net
