Veliaj paraqet në gjykatë vendimin e Kushtetueses kundër Ols Dados: U evidentuan mangësi serioze për kufizimin e lirisë sime
Friday 3 July 2026, 15:03
Dritare.net
Vendimi i sapozbardhur i Gjykatës Kushtetuese për çështjen e tij është bërë pjesë e argumenteve që Erion Veliaj paraqiti në Gjykatën Administrative, në procesin kundër prokurorit Ols Dado. Kryebashkiaku i Tiranës deklaroi para trupës gjykuese se Kushtetuesja ka evidentuar mangësi serioze në arsyetimin e masës së paraburgimit ndaj tij dhe ka vënë në diskutim respektimin e standardeve kushtetuese lidhur me kufizimin e lirisë dhe dinjitetit të tij.
“Dje u zbardh vendimi i Gjykatës Kushtetuese, i cili konstatoi se Gjykata e Lartë nuk kishte arsyetuar në mënyrë kushtetuese proporcionalitetin e masës së paraburgimit në raport me mandatin tim si Kryetar i Bashkisë së Tiranës, si dhe nuk kishte trajtuar në mënyrën e duhur pretendimet për cenimin e dinjitetit tim nga mbajtja në kabinën e xhamit. Për më tepër, një nga gjyqtaret e Gjykatës Kushtetuese ka arritur në përfundimin se, bazuar në provat e administruara, nuk rezulton të jetë arritur as standardi kushtetues i dyshimit të arsyeshëm se kam kryer vepër penale. Këto nuk janë pasoja abstrakte. Unë ndodhem prej 16 muajsh në paraburgim dhe vetë Gjykata Kushtetuese ka evidentuar mangësi serioze kushtetuese në mënyrën se si është justifikuar kufizimi i lirisë sime.
Pikërisht për këtë arsye, ky gjykim administrativ ka një rëndësi që shkon shumë përtej personit tim apo personit të z. Olsi Dado. Ky nuk është një proces për emra të përveçëm. Ky është një proces për të përcaktuar nëse një person, ligjshmëria e emërimit të të cilit vihet seriozisht në diskutim, mund të ushtrojë kompetenca që ndërhyjnë deri në kufizimin e lirisë së një qytetari, në cenimin e dinjitetit të tij dhe në pamundësimin e ushtrimit të një mandati të fituar drejtpërdrejt nga vullneti demokratik i qytetarëve të Tiranës. Në thelb, kjo çështje prek vetë besimin te shteti i së drejtës dhe te demokracia kushtetuese.
Për këtë arsye, po e vë në dispozicion të Gjykatës vendimin e djeshëm të Gjykatës Kushtetuese, si një zhvillim me rëndësi të drejtë për këtë proces”, tha ai./K.C/dritare.net
