Trump takoi Netanyahu-n dhe Zelensky-n, reagon Shtëpia e Bardhë!
Tuesday 28 July 2026, 19:07
Dritare.net
Presidenti amerikan Donald Trump zhvilloi takime të ndara me kryeministrin izraelit Benjamin Netanyahu dhe presidentin ukrainas Volodymyr Zelensky, në një seri bisedimesh që Shtëpia e Bardhë i cilësoi si “pozitive dhe produktive”.
Takimet u zhvilluan njëri pas tjetrit, me dyer të mbyllura, ndërsa pas tyre të tre liderët morën pjesë në funeralin e senatorit amerikan Lindsey Graham, i cili ndërroi jetë këtë muaj.
Sipas Shtëpisë së Bardhë, bisedimet u përqendruan në çështje të rëndësishme të sigurisë ndërkombëtare dhe marrëdhënieve me aleatët e SHBA-së.
Presidenti ukrainas Volodymyr Zelensky tha pas takimit me Trump se një nga temat kryesore ishte forcimi i mbrojtjes ajrore të Ukrainës dhe furnizimi me raketa për sistemet Patriot, të cilat Kievi i kërkon për t’u mbrojtur nga sulmet ruse.
Ndërkohë, kryeministri izraelit Benjamin Netanyahu bëri të ditur se gjatë bisedimeve me presidentin amerikan do të diskutohej edhe çështja e Iranit, në një kohë kur tensionet në Lindjen e Mesme mbeten të larta.
Një element që ra në sy gjatë takimeve ishte shmangia e ceremonive tradicionale të pritjes në Shtëpinë e Bardhë. Si Netanyahu, ashtu edhe Zelensky hynë përmes një hyrjeje anësore, pa një mirëseardhje zyrtare para kamerave.
Senatori Lindsey Graham ishte një figurë e rëndësishme në politikën amerikane dhe një mbështetës i fuqishëm si i Ukrainës në luftën kundër Rusisë, ashtu edhe i Izraelit në konfliktet e tij në Lindjen e Mesme.
Takimet mes Trump, Zelenskyt dhe Netanyahut vijnë në një periudhë delikate për diplomacinë amerikane, ndërsa Uashingtoni përballet me sfidën për të menaxhuar luftën në Ukrainë dhe tensionet mes Izraelit dhe Iranit./K.C/dritare.net
