Tërmeti në Kolumbi/ Kërkimet hyjnë në fazën përfundimtare, 265 viktima dhe afro 500 të zhdukur!
Thursday 13 August 2026, 15:03
Dritare.net
Operacionet për gjetjen e të mbijetuarve pas tërmetit shkatërrues në Kolumbi kanë hyrë në atë që autoritetet e kanë cilësuar si “fazën përfundimtare”. Bilanci ka arritur në 265 viktima, ndërsa afro 500 persona vazhdojnë të rezultojnë të zhdukur.
Tërmeti me magnitudë 7.4 goditi pjesën perëndimore të vendit më 10 gusht dhe ishte më i fuqishmi i regjistruar në Kolumbi gjatë këtij shekulli. Mbi 3,500 persona kanë mbetur të plagosur dhe më shumë se 9,550 banesa janë shkatërruar.
Ekipet e shpëtimit kanë kaluar tashmë kufirin kritik prej 72 orësh, periudhë gjatë së cilës konsiderohen më të larta mundësitë për gjetjen e njerëzve të gjallë nën rrënoja.
“Po hyjmë në fazën përfundimtare. Kjo nuk do të thotë se nuk mund të gjenden më të mbijetuar, por tani bëhet më e vështirë”, deklaroi kryebashkiaku i qytetit Cali, Alejandro Eder.
Në Pereira, ekipet po kërkojnë një shitës ambulant që dyshohet se ndodhet ende i gjallë nën rrënojat e një furre buke. Pajisjet që identifikojnë dridhjet kanë regjistruar shenja të mundshme jete, ndërsa familjarët presin pranë ndërtesës së shembur.
Operacionet vazhdojnë edhe gjatë natës me vinça, qen kërkimi dhe pajisje të posaçme. Ekipet ndalojnë punën çdo 30 minuta dhe kërkojnë heshtje të plotë për të dëgjuar zëra ose lëvizje nën rrënoja.
Presidenti Abelardo de la Espriella ka premtuar krijimin e një fondi emergjent për rindërtimin e spitaleve, shkollave, banesave dhe infrastrukturës së shkatërruar. Ai ka shpallur gjithashtu emergjencën ekonomike për përballimin e pasojave të fatkeqësisë.
