Ndërsa vitet kalojnë, ulet aktiviteti ynë fizik, edhe nëse nuk e kuptojmë. Lodhja shfaqet më shpejt, ndërsa sëmundje të ndryshme ose kufizime fizike mund ta bëjnë të vështirë lëvizjen e përditshme. Për shumë njerëz mbi 60 vjeç, aktiviteti fizik bëhet i kufizuar ose edhe inekzistent. Megjithatë, ky reduktim nuk është pa pasoja, pasi ka një ndikim serioz në shëndetin kardiovaskular dhe në përgjithësi, në cilësinë e përgjithshme të jetës.
Për këtë çështje të rëndësishme, një grup shkencëtarësh nga fushat e kardiologjisë dhe shëndetit publik vijnë për të ofruar një zgjidhje të thjeshtë, por shumë efektive. Sipas studimit të tyre, të botuar në Circulation, edhe tre minuta aktivitet fizik i moderuar në baza ditore mund të zvogëlojnë ndjeshëm rrezikun e problemeve kardiovaskulare, të tilla si ataku në zemër ose goditja në tru, si dhe rrezikun e vdekjes prej tyre.
Studimi u bazua në të dhënat e 24,139 personave, me një moshë mesatare prej 62 vjeç, nga baza e të dhënave e UK Biobank gjatë periudhës 2013-2015. Pjesëmarrësit mbanin pajisje monitoruese të aktivitetit në kyçet e duarve për shtatë ditë rresht, pa ndjekur ndonjë ushtrim të organizuar apo program trajnimi. Studiuesit krahasuan nivelet e aktivitetit fizik midis atyre që ishin më shumë ose më pak aktivë dhe arritën në një përfundim: ata që përfshinin sistematikisht periudha të shkurtra lëvizjeje të moderuar në jetën e tyre të përditshme kishin një rrezik dukshëm më të ulët të problemeve kardiovaskulare ose vdekjes.
Në fakt, ulja e rrezikut dukej se u arrit edhe kur aktiviteti ishte i shkurtër: vetëm tre minuta. Në të njëjtën kohë, hulumtimi nxori në pah disa dallime interesante midis dy gjinive, ku gratë dukeshin përgjithësisht më aktive në aktivitete të shkurtra ditore krahasuar me burrat.
Mesazhi kryesor që del nga studimi është se çdo formë lëvizjeje ka vlerë. Stërvitjet e lodhshme nuk është domosdoshmërisht e nevojshme për të mbrojtur zemrën tonë. Përkundrazi, lëvizja përmes aktiviteteve të thjeshta si punët e shtëpisë, gatimi, kopshtaria ose kositja e barit, mund të jetë shpëtimtare.
Çelësi është qëndrueshmëria dhe frekuenca: momentet e vogla të lëvizjes gjatë gjithë ditës, në mënyrë kumulative, mund të kenë një ndikim të madh pozitiv në shëndetin e zemrës dhe mirëqenien tonë të përgjithshme./K.C/dritare.net
