Stuhitë tropikale përfshijnë Shqipërinë. Ja zonat më të rrezikuara!
E Shtunë 30 Gusht 2025, 08:08
Dritare.net
Shqipëria sot do të ndikohet nga masa ajri me origjinë tropikale, të cilat do të sjellin mot të paqëndrueshëm me reshje të dendura dhe erëra të forta. Vranësirat dhe shirat do të dominojnë pjesën më të madhe të vendit, ndërsa herë pas here priten rrebeshe intensive të shoqëruara me stuhi ere.
Meteorologët paralajmërojnë se orët e pasdites do të shënohen nga reshje më të fuqishme, sidomos në qarqet e ultësirës perëndimore, ku rreziku i përmbytjeve mbetet i lartë. Në zonat malore lindore, shirat do të jenë me intensitet mesatar. Gjatë natës reshjet do të humbasin gradualisht forcën e tyre.
Temperaturat e ajrit do të shënojnë rënie të ndjeshme krahasuar me ditët e fundit. Vlerat do të variojnë nga 14°C në mëngjes deri në 29°C në mesditë, duke sjellë një freskim të ndjeshëm.
Era do të fryjë e fortë, kryesisht nga drejtimi jugor, me shpejtësi mbi 65 km/h, duke krijuar dallgëzim të fuqishëm në brigjet detare që arrin deri në 6 ballë./L.F-dritare.net
