Presidenti i Francës, Emmanuel Macron, deklaroi gjatë një vizite në Nikozia se çdo sulm ndaj Qipros është në fakt një sulm ndaj të gjithë Evropës. “Kur sulmohet Qipro, sulmohet e gjithë Evropa,” theksoi ai, duke shprehur solidaritetin e plotë të Francës me ishullin mesdhetar, i cili javën e kaluar u godit nga dronë dhe raketa.
Ai përmendi gjithashtu anijet e marinës greke, veçanërisht Kimon, të ndërtuara në Francë, duke theksuar se ato tregojnë lidhjet strategjike mes vendeve. Ai gjithashtu njoftoi se portavioni francez De Gaulle ndodhet shumë pranë Qipros, duke garantuar mbështetje të drejtpërdrejtë.
Presidenti francez vuri në dukje se Franca po punon për të mbrojtur tregtinë detare në mes të konfliktit, duke e cilësuar këtë një “mision mbrojtës”. Ai shtoi se prania franceze do të vazhdojë në Mesdhe, Gjirin Persik dhe Ngushticën e Hormuzit, duke vendosur si prioritet sigurinë energjetike dhe mbrojtjen e qytetarëve francezë dhe evropianë.
Macron komentoi gjithashtu situatën në Liban, duke e cilësuar si shumë shqetësuese. “Hezbollah duhet të ndalojë sulmet në mënyrë që Izraeli t’i ndalojë gjithashtu. Shpreh solidaritetin tim me popullin libanez,” deklaroi ai, duke shtuar se Franca po monitoron situatën në rajon me vëmendje./K.C/dritare.net
