Bleona Qereti padit për 2 milionë dollarë Evi Kokalarin në Gjykatën e Lartë të Nju Jorkut
E Shtunë 30 Gusht 2025, 15:03
Dritare.net
Këngëtarja Bleona Qereti, ka depozituar një padi pranë Gjykatës së Lartë të Nju Jorkut, Konteja Queens, kundër Evi Kokalarit, duke kërkuar 2 milionë dollarë dëmshpërblim për shpifje, mashtrim dhe dëmtim të imazhit publik. Padia është dorëzuar më 15 gusht 2025 përmes studios avokatore Waymaker LLC.
Sfondi i çështjes
Sipas dokumenteve të paraqitura në gjykatë, konflikti mes dy emrave të njohur lidhet me një fushatë të vazhdueshme shpifjesh, sulmesh publike dhe dezinformimi që, sipas Qeretit, është ndërmarrë nga Evi Kokalari prej vitit 2022. Këto veprime, thuhet në padi, kanë dëmtuar rëndë reputacionin dhe karrierën ndërkombëtare të artistes shqiptare, si dhe kanë shkaktuar pasoja emocionale tek ajo dhe familja e saj.
Në dokumente theksohet se Evi Kokalari ka publikuar dhe amplifikuar deklarata degraduese, ka tentuar bojkotim të eventeve ku Bleona ka marrë pjesë, si dhe ka ushtruar presion mbi individë me ndikim, duke ndikuar negativisht në imazhin e këngëtares në SHBA dhe Shqipëri.
Qëndrimi i Bleonës
Bleona Qereti, e cila deri më sot nuk i është përgjigjur publikisht sulmeve, deklaron se tashmë nuk mund të qëndrojë më në heshtje.
“E vërteta është e dokumentuar, dëshmitarët janë të shumtë dhe është koha që kjo sjellje të marrë zgjidhje ligjore. Publiku ka të drejtë të njohë faktet e plota dhe të mos mashtrohet nga dezinformimi.” – u shpreh Qereti.
Pritet gjykimi
Padia e Bleona Qeretit kundër Evi Kokalarit pritet të shqyrtohet nga Gjykata e Lartë e Nju Jorkut në ditët në vijim. Çështja ka tërhequr interes të madh mediatik, si në Shqipëri ashtu edhe në Shtetet e Bashkuara, për shkak të profilit publik të të dyja palëve dhe natyrës së akuzave./l.f-dritare.net
