Sekreti i bukës së misrit! Nga mulliri i gurit te furra me dru
Friday 17 July 2026, 20:08
Dritare.net
Fotoreporteri britanik Robert Hackman, së bashku me shefin e kuzhinës së "Mrizit të Zanave", Marko Pemaj sjellin në fokus traditën e përgatitjes së bukës së misrit, një proces që nuk është thjesht një recetë, por një trashëgimi e ruajtur ndër breza. Në reportazhin e tij për DritareTV, Hackman dokumenton hap pas hapi mënyrën se si kjo bukë përgatitet ende sipas metodave tradicionale, nga bluarja e misrit deri te pjekja në furrën me dru.
Përgatitja nis shumë përpara se brumi të marrë formë. Gjithçka fillon te mulliri i gurit, ku misri i bardhë bluhet i thatë dhe me shpejtësi shumë të ulët, për të ruajtur cilësinë dhe aromën e tij natyrale. Sipas mjeshtërve të "Mrizit të Zanave", bluarja e shpejtë krijon nxehtësi që dëmton miellin, ndaj procesi kërkon kohë, durim dhe kujdes. Mielli i sapobluar përdoret i freskët, pasi pas disa ditësh humbet cilësitë e tij.
Receta mbetet e thjeshtë dhe besnike ndaj traditës së vjetër: miell misri i bardhë, ujë i nxehtë dhe pak kripë. Asnjë maja dhe asnjë përbërës tjetër. Brumi punohet me duar nga mjeshtrit e kuzhinës, duke kërkuar forcë dhe përvojë, derisa të arrijë trashësinë dhe lidhjen e duhur. Çdo lëvizje është pjesë e një procesi të trashëguar ndër breza, ku teknika tradicionale përcillet si një kujtesë e gjallë e jetës në malësi.
Pas përgatitjes së brumit, buka vendoset në furrën tradicionale me dru. Ajo nuk piqet mbi flakë të drejtpërdrejtë, por mbi prush të nxehtë e të qëndrueshëm, që i jep asaj pjekjen e njëtrajtshme dhe aromën karakteristike të drurit e të tymit. Përmes këtij procesi, Robert Hackman dhe ekipi i "Mrizit të Zanave" tregojnë sesi një ushqim i lindur nga nevoja për mbijetesë është kthyer sot në një nga shijet më të veçanta të trashëgimisë gastronomike shqiptare./dritare.net
