Rama reagon për deklaratat e ministres serbe
Thursday 16 July 2026, 17:05
Dritare.net
Kryeministri Edi Rama ka reaguar pas polemikave të shkaktuara nga deklarata e ministres serbe Snezhana Paunoviç për spastrimin etnik të Kosovës. Përmes një postimi në rrjetet sociale, Rama tha se Shqipëria ka reaguar përmes ministrit të Jashtëm, duke theksuar se një shtet që respekton veten nuk duhet të përgjigjet ndaj çdo deklarate të bërë nga individë të veçantë.
“Ideja se çdo njeri që ka një zë publik, çdo institucion dhe autoritet, u dashka të reagojë për çdo idiotësi të thënë në serbisht, deri edhe nga personazhe që sa pa e thënë idiotësinë vetëm familja e tyre e dinte se ekzistonin, është një ide që tregon se sa pak e respektojnë veten dhe vendin ata që vënë kujën e që kërkojnë edhe hesap pse nuk reagon ky e ai. Ne kemi reaguar përmes ministrit të jashtëm, siç bën një shtet që ka respekt për veten dhe kush kërkon nga ne që të bëhemi kor histerik sa herë del një çyryk në Beograd e flet përçart, ka ngatërruar adresë. Mjafton të shikosh reaguesit e rastit nga Tirana, se si gjejnë një kalë të ngordhur për të marrë poza luftëtarësh në front dhe e kupton menjëherë pse kategoria e tyre meriton vetëm keqardhjen e radhës, ndërkohë që po deshe të mbash ijet me dorë duhet edhe të gjesh kohë t’i lexosh.”, shkruan Rama./K.C/dritare.net
