Zgjedhja e shkallëve në vend të ashensorit mund të ulë ndjeshëm rrezikun e sëmundjeve të zemrës dhe vdekjes së parakohshme, sipas një studimi të ri të publikuar nga The Times.
Studiuesit analizuan të dhënat e rreth 456 mijë të rriturve, të ndjekur për një periudhë mesatare prej 14 vjetësh. Rezultatet treguan se personat që ngjisnin rregullisht shkallët kishin 24% më pak rrezik të vdisnin nga çfarëdo shkaku dhe 39% më pak rrezik të humbnin jetën nga problemet kardiovaskulare.
Ngjitja e shkallëve lidhej gjithashtu me një rrezik më të ulët për infarkt, goditje në tru dhe insuficiencë kardiake. Sipas ekspertëve, përfitimet mund të shfaqen edhe kur kjo veprimtari kryhet vetëm për pak minuta gjatë javës.
Rreth gjashtë kate shkallë në ditë duket se sjellin përfitimin më të madh, megjithëse studiuesit theksojnë se edhe një sasi më e vogël lëvizjeje mund ta ndihmojë zemrën.
Autorët e studimit thonë se ngjitja e shkallëve është një mënyrë e thjeshtë dhe pa kosto për ta përfshirë aktivitetin fizik në jetën e përditshme. Megjithatë, studimi tregon një lidhje mes këtij zakoni dhe shëndetit më të mirë, por nuk vërteton se shkallët janë shkaku i drejtpërdrejtë i uljes së rrezikut./ The Times
