Vapa ekstreme sjell një ide të pazakontë: Frigoriferë për njerëzit
Thursday 13 August 2026, 10:10
Dritare.net
A do të guxonit të hynit në një frigorifer për t’u freskuar gjatë ditëve të nxehta? Në Japoni, kjo tashmë është e mundur.
Në një kohë kur temperaturat e larta po bëhen gjithnjë e më shqetësuese, një kompani japoneze ka prezantuar “Do Hiemon”, një kabinë ftohëse me përmasa sa një person, e konceptuar për të ulur shpejt temperaturën e trupit.
Emri Do Hiemon përkthehet përafërsisht si “Kutia e Ftohjes”. Pajisja duket si një frigorifer i madh ose një makinë shitëse dhe është projektuar duke marrë frymëzim pikërisht nga makinat frigoriferike të shitjes automatike, sipas kompanisë.
Si funksionon?
Personi hyn brenda kabinës, ulet në një karrige dhe ekspozohet ndaj ajrit të ftohtë. Kabina mbahet rreth 15°C, ndërsa ajri që drejtohet në zonën e kokës, qafës, shpatullave dhe shpinës mund të jetë rreth 5°C.
Sipas të dhënave të kompanisë, përdoruesit mund të ndiejnë një lehtësim të temperaturës pas vetëm disa minutash, ndërsa një qëndrim rreth 10 minutash synon të ndihmojë në rikuperimin nga lodhja e shkaktuar prej vapës. Pajisja fiket automatikisht pas 20 minutash.
Kushton rreth 7 mijë paund
“Do Hiemon” po vendoset në hapësira publike në Japoni dhe po u shitet bizneseve që kanë punonjës të ekspozuar ndaj temperaturave të larta, si kantieret e ndërtimit, fabrikat dhe ambientet e aktiviteteve në natyrë.
Çmimi i një njësie është rreth 1.5 milionë jen, ose afërsisht 7 mijë paund.
Pavarësisht çmimit të lartë, ideja po tërheq vëmendje pasi temperaturat ekstreme po shtojnë rrezikun e goditjeve nga nxehtësia.
Kjo pajisje nuk është menduar si zëvendësim për kondicionerët, por si një stacion i shpejtë ftohjeje, ku një person mund të rikuperohet pasi ka kaluar kohë në temperatura të larta.
Koncepti ka ngjallur edhe një pyetje kurioze: A do të hynit në një “frigorifer për njerëzit” për t’i shpëtuar vapës?
