Udhëtimi dy-javor i një amerikani në Shqipëri: Jeni të mrekullueshëm. Do të kthehem sërish!
E Mërkurë 26 Gusht 2020, 13:01
Dritare.net
Pandemia nuk i ka ndalur turistët e huaj të vijnë në Shqipëri. David Hoffmann, është njëri prej tyre. Ai ka udhëtuar për 17 orë, nga Miami në Tiranë. Ky është udhëtimi i tij i parë pas 5 muajsh, aspak e zakontë për një njeri eksplorues, që udhëtimin e ka pjesë të rëndësishme të jetës së tij. David, tregon se Shqipëria ka qenë prej kohësh në listën e tij të dëshirave. Duke qenë se është ndër të paktat vende që nuk ka masa kufizuese për turistët, ai kishte menduar se ky ishte momenti i duhur që Shqipëria të mos mbetej më gjatë në listën e pritjes.
Me maskë, bluzë dhe kapele kudo të stampuara simbolet kuq e zi, David niset në Shqipëri me një synim:
"Për 14 ditë, do të shikoj pëllëmbë më pëllëmbë Shqipërinë". Sigurisht aq sa koha ia lejon.
Ai vizitoi pikat kryesore në Tiranë, Durrës, Krujë, Shkodër, Alpet Shqiptare, Berat, Elbasan, Pogradec, Korçë, Gjirokastër, Sarandë dhe Vlorë.
Në një video të shkurtër publikuar në rrjetet sociale të tij, për të ndarë me 135 mijë ndjekës eksperiencën e tij në Shqipëri, ai shprehet i mahnitur nga vendet, natyra, kultura e veçanërisht ushqimi, që David nuk ndal së thënuri "i mrekullueshëm, i mrekullueshëm".
Kush erdh në Shqipëri e nuk provoi rakinë? Epo as ai nuk bën përjashtim.
"Në Farkë, provova fërgesën dhe jufkat. Që në ditën e parë jam i dashuruar me këtë vend. Veçanërisht me ushqimin dhe njerëzit.
Në Durrës, mu duk sikur isha në parajsë. Kruja më mahniti. Historia, tradita. Pashë nga afër se si ata bëjnë qeleshet. Provova një raki tre vjeçare".
Siç duket, rakia i ka shijuar aq shumë Davidit, sa në çdo ndalesë të qyteteve, e bën si shqiptarët: i kthen një gotë. Siç bëri edhe në Theth. Vend që i kujtoi Zvicrën. Në Lezhë, nuk kishte si të mos ndalonte te Mrizi i Zanave, ku pa nga afër si përgatitej gjithçka ç'kishte në tavolinë.
"Ky vend është mahnitës. Duhet të vish patjetër këtu nëse viziton Shqipërinë", shkruan David.
Më pas udhëtimi i tij vijon në Berat, Pogradec, Korçë, Përmet dhe Gjirokastër.
"Ditë fenomenale në Gjirokastër. Dëgjonim muzikë live duke ngrënë drekë".
Rivierën Shqiptare, David e quan sureale. Pasi ka vizituar disa nga plazhet më të njohura të jugut, destinacioni i fundit qe Vlora.
"Një vend mahnitës", shkruan David.
"Ky ishte një nga udhëtimet më të jashtëzakonshëm të jetës sime. Çfarë njerëzish të sjellshëm, dhe zemërgjerë janë shqiptarët. Do të kthehem sërish me siguri"./L.F-dritare.net
