Lamtumirë! Miq, kolegë e personalitete flasin për Artur Zhejin
E Shtunë 23 Gusht 2025, 20:08
Dritare.net
Kryeministri Edi Rama ka reaguar pas lajmit të ndarjes nga jeta të gazetarit dhe analistit Artur Zheji. Në një postim të shkurtër në rrjetet sociale, Rama shpreh ngushëllimin e tij me tone personale dhe përmalluese.
“Lamtumirë mik kohësh të tjera dhe e gjetsh matanë paqen për shpirtin,” shkroi kreu i qeverisë.
Gazetari Artur Zheji ndërroi jetë këtë të premte në moshën 63-vjeçare. Ai mbërriti në urgjencë pa shenja jete, ndërsa dyshohet se shkaku ka qenë një arrest kardiak.
Ndarja nga jeta e Zhejit ka sjellë reagime të shumta nga personalitete të politikës, medias dhe artit, që e kanë cilësuar atë si një prej zërave më kritikë e të spikatur të publicistikës shqiptare.
Rudina Xhunga për ndarjen nga jeta të Artur Zhejit: "U nda nga jeta Artur Zheji, koleg dhe mik. Shumë e parakohshme, shumë trishtuese kjo ikje që të la pa fjalë."
Blendi Fevziu e cilësoi një lajm fort të hidhur, duke e quajtur Zhejin “intelektual të spikatur, mendje kritike dhe gazetar kalibri që do t’i mungojë shumë publikut”.
Erion Veliaj u shpreh se Zheji ishte “gazetar profesionist, analist brilant dhe intelektual i angazhuar për mbrojtjen e pavarësisë së medias dhe shtetit të së drejtës”, duke e cilësuar ndarjen e tij si një humbje të pazëvendësueshme.
Ilir Meta e kujtoi si “personalitet të veçantë të gazetarisë, shkrimtar dhe dramaturg, pasardhës i një familjeje të shquar intelektualësh”, ndërsa e quajti një nga miqtë e tij më të afërt.
Spartak Ngjela tha se Zheji ishte “një nga emblemat e gazetarisë pas vitit 1990 dhe një nga mendjet më të ditura që ka njohur”, duke e cilësuar pasardhës të denjë të prindërve të tij, Petro Zheji dhe Besa Imami.
Roland Qafoku, i cili e pati të ftuar në emisionin “Dekalog” më 4 nëntor 2024, kujtoi se ajo ishte ndoshta “e vetmja intervistë jete që ai dha për një media”, duke e cilësuar një bisedë të paharrueshme plot rrëfime personale./L.F-dritare.net
