Oficeri hero i Gramshit shpëton të moshuarën nga flakët
E Enjte 14 Gusht 2025, 13:01
Dritare.net
Në Gramsh, mes zjarreve që kanë përfshirë zona të tëra, oficeri i Policisë së Krimeve, Alfred Zhupani, u bë shembull i guximit dhe humanizmit. Ai hyri mes flakëve, në një moment kur çdo sekondë mund të ishte fatale, mori në krah një grua të moshuar dhe e nxori në vend të sigurt. Pamjet dhe rrëfimet nga vendngjarja tregojnë vendosmërinë e tij për të mos e lënë askënd pas.
Prej ditësh, forcat e armatosura, policia dhe zjarrfikësit kanë qenë në vijën e parë të përballjes me flakët, duke punuar pa pushim dhe shpesh në kushte të rrezikshme. Reagimi i shpejtë i shtetit, mobilizimi i menjëhershëm i mjeteve dhe personelit, si dhe bashkëpunimi me banorët e zonës, kanë bërë që vatrat të izolohen dhe dëmet të minimizohen.
Një prej arsyeve pse nuk pati humbje jetesh dhe u shpëtua një pjesë e konsiderueshme e banesave është pikërisht reagimi në kohë, nga alarmimi i hershëm, evakuimi i menjëhershëm, deri te koordinimi mes forcave të emergjencës.
Sot, mirënjohja shkon për të gjithë ata që rrezikuan jetën për të shpëtuar të tjerët dhe emri i Alfred Zhupanit mbetet një simbol i këtij përkushtimi dhe guximi./dritare.net
