Ministri i Mbrojtjes në uzinën e armëve në Gramsh: Do të rihapim fabrikat!
E Mërkurë 28 Gusht 2024, 09:09
Dritare.net
Uzinat dhe fabrikat e vjetra parashikohen të rijetëzohen. Këtë njoftoi ministri i Mbrojtjes Pirro Vengu pasi inspektoi nga afër Uzinën Mekanike në Gramsh. Kjo vizitë ishte për të vlerësuar gjendjen aktuale dhe avantazhet që kjo uzinë siguron, si në aspektin e kapaciteteve njerëzore, ashtu dhe ato infrastrukturore.
Në fokusin e Ministrisë së Mbrojtjes është edhe Kombinati Mekanik në Poliçan, aktualisht jashtë funksionit. Sipas njoftimit të ministrisë Poliçani do të jetë pjesë e strategjisë së qeverisë për jetësimin e industrisë së mbrojtjes për të tërhequr investime të rëndësishme nga sektori privat, të cilat mund ta rikthejnë atë në një aset të rëndësishëm për mbështetjen e Forcave të Aratosura dhe zgjerimin e kapaciteteve prodhuese për qëllime ushtarake dhe civile.
Rizgjimi i fabrikave dhe uzinave parashikohet të bëhet me një formulë të re menaxhimi nëpërmjet një shoqërie tregtare shtetërore, që do të drejtojë procesin e ringritjes së Industrisë së Mbrojtjes. Shoqëria do të marrë në zotërim aktivët e ndërmarrjeve shtetërore, ndërsa fuqia punëtore aktuale do të vijojë marrëdhëniet e punës nën një perspektivë të re dhe premtuese.
Shoqëria tregtare shtetërore ka objekt veprimtarie projektimin, prodhimin, riparimin, demilitarizimin dhe tregtimin, brenda dhe jashtë vendit, të armëve, municioneve, teknologjive dhe pajisjeve ushtarake, si dhe çdo aktivitet të lidhur me këtë veprimtari, në funksion të politikave kombëtare të Sigurisë dhe Mbrojtjes dhe rritjes së kapaciteteve të Mbrojtjes.
Nga ana tjetër, rijetëzimi i këtij sektori pritet të kontribuojë në rritjen e punësimit dhe zhvillimin ekonomik të vendit./L.F-dritare/net
