Marigo Pozio: Nëna e flamurit, mes lavdisë dhe harresës
E Hënë 25 Gusht 2025, 19:07
Dritare.net
Marigo Pozio, gruaja e njohur që i dha flamur Pavarësisë më 28 Nëntor 1912, mbetet një figurë emblematike e historisë shqiptare, por njëkohësisht edhe një simbol i harresës institucionale.
Jeta dhe veprimtaria
E lindur në Korçë më 2 shkurt 1882, bijë e priftit Papa Kosta Poçi dhe Lenkë Ballaurit, Marigoja u arsimua në shkollën e parë shqipe të qytetit dhe që herët u përfshi në rrethet atdhetare. Pas martesës me Jovan Pozion nga Hoçishti, çifti u vendos në Vlorë, ku shtëpia e tyre në lagjen Muradie u bë vatër patriotizmi dhe kulturë.
Më 28 Nëntor 1912, sipas dëshmive bashkëkohëse, ishte Marigoja ajo që përgatiti flamurin historik të ngritur nga Ismail Qemali. Pas shpalljes së Pavarësisë, ajo financoi dhe shpërndau flamuj për institucionet e para shtetërore, duke fituar përjetësisht titullin “Nëna e flamurit”.
Kontributi shoqëror
Marigoja nuk u ndal vetëm te akti i 1912-s. Në maj 1914, ajo organizoi gratë e Vlorës për të ndihmuar të plagosurit në kufirin grek. Po ashtu, më 1921 themeloi gazetën “Shpresa shqiptare”, një nga zërat e parë femërorë në shtypin shqiptar.
Harresa dhe fundi i jetës
Megjithë kontributet e mëdha, Marigo Pozio u përball me harresën institucionale. Më 1928, publicisti Kristo Floqi denoncoi në shtyp gjendjen e saj të vështirë, duke theksuar se nuk i ishte njohur statusi i veteranes. Ajo ndërroi jetë më 23 shkurt 1932 në Vlorë dhe u varros në manastirin mesjetar të Shën Mërisë në Zvërnec.
Sot, Marigoja kujtohet si një figurë e pazëvendësueshme e Pavarësisë dhe si shembull i rolit të grave në historinë shqiptare./dritare.net
View this post on Instagram
