Gonxhja: Kalaja e Bashtovës, një hapësirë e re për kulturën dhe turizmin
E Shtunë 30 Gusht 2025, 16:04
Dritare.net
Kalaja e Bashtovës, një nga monumentet më të rëndësishme të trashëgimisë kulturore shqiptare, u inaugurua pas një procesi të plotë restaurimi dhe rikualifikimi. Projekti u realizua me mbështetjen e Bashkimit Europian përmes programit #EU4Culture, të zbatuar nga UNOPS.
Në ceremoninë e përurimit mori pjesë Ministri i Ekonomisë, Kulturës dhe Inovacionit, Blendi Gonxhja, i cili theksoi se ky investim është një shembull i bashkëpunimit të suksesshëm mes Shqipërisë dhe partnerëve ndërkombëtarë. Sipas tij, rikthimi në jetë i Kalasë së Bashtovës tregon se procesi i integrimit europian sjell rezultate konkrete për qytetarët.
Kalaja, e cila dikur ishte një monument i së kaluarës, tashmë është transformuar në një hapësirë moderne kushtuar kulturës, turizmit dhe zhvillimit të qëndrueshëm të komunitetit. Përveç restaurimit, është ndërtuar edhe një qendër vizitorësh dhe janë shtuar funksione të reja kulturore e turistike, duke e kthyer atë në një destinacion të rëndësishëm në hartën e kalave shqiptare dhe të Ballkanit.
Ky investim pritet të nxisë zhvillimin e turizmit kulturor dhe të përforcojë identitetin historik e kulturor të zonës së Bashtovës./L.F/dritare.net
