Angela Merkel, kancelarja gjermane, ka reaguar ditën e sotme përmes një deklarate për media në Berlin së bashku me kryeministrin e Kroacisë, Andrej Pllenkovic, në lidhje me çështjen e korrigjimit të kufijve Kosovë-Serbi. Merkel ka paralajmëruar se, korrigjimi i kufijve do të sjellë pasoja të mëdha për të gjithë rajonin e Ballkanit. Sipas saj, korrigjimi i kufijve mund të krijojë negociata të ngjashme edhe mes vende të tjera.
“Ne natyrisht se i mbështesim të gjitha bisedat, që mund të çojnë drejt qëllimit, por në të njëjtën kohë, themi se integriteti territorial ashtu siç është tani është një vlerë e rëndësishme. Duhet të jemi të kujdesshëm që negociatat në një vend të mos çojnë në negociata në një vend tjetër.”,-u shpreh Merkel.
Ndërkohë, kryeministri i Kroacisë u shpreh se, duhet të respektohen kufijtë dhe çdo ndryshim që do të bëhet, mund të ndikojë edhe në vende të tjera të Ballkanit, dhe kjo mund të çojë në destabilitet./K.C/Dritare.net
