Në prag të një raundi të ri bisedimesh ndërkombëtare, zëvendëspresidenti i Shteteve të Bashkuara të Amerikës JD Vance ka deklaruar se është “i gatshëm për negociata” me Iranin, të cilat pritet të zhvillohen gjatë fundjavës në Pakistan.
Duke folur para se të nisej me avionin Air Force Two, Vance tha se SHBA-ja do të bashkëpunojë me Teheranin nëse palët veprojnë “me mirëbesim”, por paralajmëroi se nëse Irani “përpiqet të luajë lojëra politike”, Uashingtoni nuk do të jetë i gatshëm të vazhdojë dialogun.
Ndërkohë, delegacioni iranian ende nuk ka mbërritur në Islamabad, ndërsa kryetari i parlamentit iranian ka deklaruar se një armëpushim në Liban duhet të arrihet para se të nisin bisedimet zyrtare.
Sipas burimeve diplomatike, një zyrtar i lartë ka bërë të ditur se Libani do të marrë pjesë në negociata të ndara javën e ardhshme me Izraelin, vetëm nëse më parë arrihet një armëpushim i qëndrueshëm.
Mbetet ende e paqartë nëse marrëveshja e përkohshme e armëpushimit përfshin edhe situatën në rajon, ndërsa ekspertët po analizojnë ndikimin e mundshëm në një nga korridoret më strategjike të transportit të naftës, Ngushticën e Hormuzit.
Sipas analistëve, sfida kryesore mbetet gjetja e një formule që të kënaqë të gjitha palët, ndërsa nuk është e qartë nëse negociatat mund të sjellin një zgjidhje të shpejtë për tensionet në rajon./K.C/dritare.net
