Sulmet vazhdojnë. Në ç'pikë janë negociatat e paqes mes Ukrainës dhe Rusisë!
E Martë 25 Nëntor 2025, 08:08
Dritare.net
Të paktën gjashtë persona janë vrarë gjatë sulmeve ruse në Kiev gjatë natës, ka bërë të ditur kryebashkiaku i qytetit. Sulmet erdhën menjëherë pasi presidenti ukrainas Volodymyr Zelensky mirëpriti ndryshimet në një plan paqeje të mbështetur nga Shtetet e Bashkuara.
Kievi dhe aleatët e tij në Evropë kanë ushtruar presion ndaj SHBA-së për të ndryshuar planin, nga frika se ai i bënte lëshime të tepërta Rusisë.
Në Rusi, zyrtarët njoftuan se tre persona janë vrarë pas sulmeve ukrainase në rajonet kufitare të Krasnodar dhe Rostov.
Si Ukraina ashtu edhe SHBA-ja kanë sinjalizuar përparim ditët e fundit. Zelensky lëshoi një mesazh optimist vonë mbrëmë, duke thënë se plani – i cili fillimisht përmbante 28 pika – është shkurtuar dhe se “shumë nga elementet e duhura janë marrë parasysh”.
Ai shkroi në rrjetet sociale: “Tani lista e hapave të nevojshëm për t’i dhënë fund luftës mund të bëhet e realizueshme.”
Duke lënë të kuptohet se bisedime të mëtejshme me Donald Trump janë në plan, Zelensky shkroi:
“Ekipi ynë ka raportuar për draftin e ri të hapave, dhe kjo është vërtet qasja e duhur – do të diskutoj çështjet sensitive me Presidentin Trump.”
Zyrtarë amerikanë dhe ukrainas u takuan në Gjenevë të dielën për të diskutuar planin. Përfaqësuesit rusë nuk morën pjesë në takim dhe i hodhën poshtë ndryshimet, duke i quajtur ato “plotësisht jokonstruktive”.
Takime të tjera diplomatike priten në ditët në vijim, ndërsa kryeministri britanik Sir Keir Starmer do të organizojë një takim virtual me aleatët e Ukrainës./L.F-dritare.net
