Gjuhëtari: Vendimi historik i Kosovës që vulosi fatin e gjuhës shqipe!
E Hënë 24 Nëntor 2025, 20:08
Dritare.net
Rruga drejt gjuhës standarde shqipe kaloi përmes një momenti historik dhe vendimtar në Kosovë. Gjuhëtari Xhevat Lloshi shpjegon në Shqip nga Rudina Xhunga në DritareTV se pas Luftës së Dytë Botërore, politika shoveniste serbe synonte të thellonte ndarjen mes shqiptarëve, duke promovuar idenë e një gjuhe të veçantë 'shiptarski', të ndryshme nga ajo e Shqipërisë, me qëllim shkëputjen kulturore dhe kombëtare të Kosovës.
Në këtë sfond të vështirë, intelektualët dhe veçanërisht lëvizja studentore e vitit 1968 luajtën një rol kyç. Ata e shndërruan lëvizjen studentore evropiane në një kauzë kombëtare për gjuhën. Kulmi i kësaj përpjekjeje ishte Konsulta Gjuhësore e Prishtinës në vitin 1968. Kjo ngjarje, sipas Lloshit, ishte po aq e rëndësishme sa Kongresi i Manastirit.
Delegatët e Prishtinës, të udhëhequr nga parimi themelor “Një komb, një gjuhë letrare”, morën vendimin historik për të pranuar standardin gjuhësor që po zhvillohej në Shqipëri. Ky akt patriotik dhe largpamës jo vetëm që dështoi planet përçarëse, por i hapi rrugën përfundimisht Kongresit të Drejtshkrimit të vitit 1972 në Tiranë.
Pa vendimin e guximshëm të Kosovës, unifikimi i gjuhës do të kishte qenë i pamundur. Ky proces standardizoi gjuhën shqipe, duke e vendosur atë në rrugën e një gjuhe moderne evropiane, të aftë për t'iu përgjigjur të gjitha nevojave të shoqërisë. Lloshi përfundon duke theksuar se gjuha është ajo që na bën shqiptarë, dhe në rastin unik të Shqipërisë, është vetë gjuha që i ka dhënë emrin kombit dhe vendit./dritare.net
