Në zemër të malësisë së Klosit, ndodhet një urë historike që mban një emër me peshë dhe mister, "Ura e Vashës". Kjo urë e vjetër, ndërtuar në shekullin e 16-të ose 18-të, jo vetëm që përçon historinë e kalimit dhe lidhjes së dy komuniteteve, por bart edhe legjenda dhe gojëdhëna që e bëjnë atë një pikë të veçantë të trashëgimisë kulturore dhe turistike të Shqipërisë.
Inesa Çupës nga Bujtina Çupa në Klos, tregon për DritareTv se ura është ndërtuar nga familja Skura, e cila kishte një vajzë të vetme që nuk dëshironte të martohej. Vajza shiti pajën e saj, duke lejuar që familja të ndërtonte urën, që lidhte zonën e Klosit me rrugën e Arbërit.
Ura shërbente si një pikë kyçe për kalimin e karvanëve dhe zhvillimin e tregtisë në këtë zonë, duke sjellë një bum të rëndësishëm ekonomik dhe duke i dhënë zë një rruge strategjike të trafikut të lashtë.
Por "Ura e Vashës" nuk është vetëm një strukturë guri, ajo ruan në vetvete disa legjenda misterioze dhe dramatike. Një legjendë thotë se vajzat që mos binin në duart e turqve osmanë, u flijuan duke u hedhur nga ura. Një tjetër thotë se ura u ndërtua si simbol i pajtimit mes dy komuniteteve të ndryshme, Gurit të Bardhë dhe Klosit, duke garantuar bashkëpunimin dhe zhvillimin tregtar të zonës.
Sipas dëshmive të banorëve dhe trashëgimtarëve lokalë, ura është më shumë se një monument; ajo është një histori e gjallë që lidhet me sakrificën, paqen dhe bashkëjetesën. Ndërtimi i saj u mundësua nga sakrificat e një vashë, që nëpërmjet pasurisë së saj ndihmoi në lidhjen dhe zhvillimin e rajonit.
Sot, ura është kthyer në një atraksion turistik të rëndësishëm, i vizituar nga shumë turistë vendas dhe të huaj që kërkojnë të njohin historinë dhe natyrën e pasur të kësaj zone.
Inesa thekson se kjo zonë është ideale për ata që kërkojnë relaksim në natyrë, larg zhurmës së qyteteve, ku mund të shijojnë ujërat e pastër, lumenjtë dhe bukuritë natyrore, si dhe të ndjejnë historinë që përçon ura.
Megjithatë, ajo nënvizon se infrastruktura, sidomos rruga që çon drejt urës, ka nevojë për përmirësim për të lehtësuar qasjen dhe për të nxitur më shumë zhvillimin turistik, duke e bërë kështu "Ura e Vashës" një nga thesaret e pakta historike që duhet ruajtur dhe promovuar.
Në përfundim, kjo urë, e mbushur me histori, legjenda dhe sakrifica, mbetet një dëshmi e gjallë e kulturës dhe traditës shqiptare, një vend ku historia dhe natyra takohen për të krijuar një eksperiencë unike për çdo vizitor./K.C/dritare.net
