Fotoreporteri britanik zbulon Dukagjinin!
E Shtunë 21 Qershor 2025, 19:07
Dritare.net
Për herë të parë, një fotoreporter britanik ka shkelur në një nga trevat më të izoluara, por më mahnitëse të Shqipërisë, Luginën e Shalës, në zemër të Dukagjinit. Robert Hackman, një emër i njohur në botën e albumeve dhe dokumentarëve ndërkombëtarë, ka udhëtuar drejt veriut të thellë për të realizuar një reportazh unik për Dritare TV.
Hackman e tregon Dukagjinin e izoluar, duke udhëtuar përmes terreneve të thepisura, shtigjeve të thella dhe peizazheve që të lënë pa frymë.
Në dokumentarin e realizuar nga Dritare TV, Hackman flet për potencialin e jashtëzakonshëm turistik të Dukagjinit, që edhe pse nuk është ende pjesë e guidave turistike, do të jetë së shpejti, kryeqyteti i veriut në turizëm.
Hackman flet së bashku me djalin e Dukagjinit, Gjon Dukgilaj, për legjendat e malësorëve, historinë e burrneshave dhe njerëzit që e ruajnë me fanatizëm kulturën, gjuhën dhe shpirtin e Alpeve.
“U ndjeva sikur po zhytesha në një botë tjetër, të paprekur nga koha. Kjo është Shqipëria që bota duhet të njohë,” thotë Hackman në dokumentar.
Ky dokumentar shënon një hap të madh për promovimin e trashëgimisë kulturore dhe natyrore të veriut të Shqipërisë, në një mënyrë që i flet botës. Përmes rrëfimit të një fotoreporteri britanik, që u bë pjesë e kësaj toke për disa ditë, historia e Dukagjinit merr jehonë ndërkombëtare.
Dokumentari është tashmë i publikuar nga Dritare TV dhe është një dëshmi se Shqipëria e thellë, ajo e legjendave dhe shpirtit të vërtetë, është gati të tregojë historinë e saj për të gjithë botën./L.F-dritare.net
