Agjërimi me ndërprerje, a janë mbivlerësuar përfitimet?
Tuesday 18 August 2026, 12:12
Dritare.net
Agjërimi me ndërprerje është kthyer në një nga mënyrat më të njohura për humbjen e peshës, por studimet e fundit po ngrenë pikëpyetje mbi disa prej përfitimeve të mëdha shëndetësore që i atribuohen kësaj metode.
Sipas BBC, agjërimi me ndërprerje, që konsiston në kufizimin e ushqimit në orare të caktuara ose në agjërimin në ditë të caktuara, mund të ndihmojë në humbjen e peshës. Megjithatë, te njerëzit rezultatet nuk kanë qenë aq të jashtëzakonshme sa në studimet me kafshë.
Studiuesit vlerësojnë se kjo mënyrë ushqyerjeje mund të sjellë një humbje prej rreth 5% të peshës trupore, një rezultat që është afërsisht i ngjashëm me atë të dietave të tjera. Gjithashtu, janë vërejtur përmirësime në disa tregues metabolikë, përfshirë kolesterolin dhe presionin e gjakut.
Por pretendimet se agjërimi me ndërprerje mund të parandalojë kancerin, të përmirësojë ndjeshëm funksionet e trurit apo të zgjasë jetën, nuk janë konfirmuar qartë te njerëzit. Shumë prej këtyre rezultateve janë parë te minjtë dhe kafshë të tjera laboratorike, ndërsa provat te njerëzit mbeten të kufizuara dhe shpesh kontradiktore.
Një tjetër problem i madh është vështirësia për të matur saktësisht se çfarë hanë njerëzit. Shumë studime mbështeten te ditarët ushqimorë, por njerëzit mund të harrojnë ose të mos raportojnë gjithçka që konsumojnë.
Për këtë arsye, shkencëtarët po testojnë teknologji të reja, si sensorë që regjistrojnë përtypjen, pajisje që monitorojnë ushqimin dhe analiza të gjakut e urinës, me qëllim që të kuptojnë më saktë ndikimin e dietave.
Në përfundim, ekspertët theksojnë se agjërimi me ndërprerje mund të jetë një mënyrë efektive për kontrollin e peshës, por nuk ka prova të mjaftueshme për ta konsideruar një “zgjidhje magjike” për shëndetin dhe jetëgjatësinë./dritare.net
