Historiania britanike Miranda Vickers: Paralajmëruam kaosin e ‘97-s në Shqipëri që në 1996
Sunday 25 October 2026, 10:10
Dritare.net
Historiania britanike Miranda Vickers, njohëse e historisë së Ballkanit dhe sidomos e Shqipërisë, tregon në një intervistë për Dritare TV se ajo dhe kolegu i saj James Pettifer kishin paralajmëruar publikisht për trazirat e vitit 1997.
Vickers rrëfeu se pas zgjedhjeve të vitit 1996, të cilat sipas saj dhe kolegut të saj u manipuluan nga Partia Demokratike e Sali Berishës, ata shkruan në gazeta dhe media se vitin tjetër do të kishte zemërim dhe kaos në Shqipëri. “Thamë se vitin tjetër do të ketë zemërim dhe kaos në Shqipëri, siç edhe ndodhi në ‘97”, tha ajo.
Interesimin për Shqipërinë Vickers e ka nisur që e re, kur jetoi pesë vjet në Greqi si mësuese e anglishtes. Çdo tre muaj duhej të dilte nga Greqia për të rinovuar vizën dhe udhëtonte drejt Gevgelijas. Atje u takua me shqiptarët e parë, që i thanë se vinin “nga matanë maleve”, nga Dibra. “Isha e magjepsur dhe doja shumë të shkoja në atë vend, që në kohën e Enver Hoxhës ishte i mbyllur”, tregoi ajo.
Kur u kthye në Angli në mesin e viteve ‘70 nuk gjeti libra vetëm për Shqipërinë, pasi çdo gjë lidhej me Jugosllavinë, Greqinë ose Ballkanin në përgjithësi. Pas masterit në historinë e Ballkanit shkroi librin “The Albanians: A Modern History”, botuar në vitin 1995, që sipas saj ribotohet çdo vit.
Me shpërbërjen e Jugosllavisë dhe rënien e regjimit në Shqipëri, ajo dhe Pettifer u bënë gazetarë për “The Guardian”, “The Times” dhe “The Independent”. Më pas Vickers u bë analiste për Tiranën e Grupit Ndërkombëtar të Krizave (International Crisis Group). Së bashku shkruan edhe librin “The Albanian Question: Reshaping the Balkans”, për krizën e piramidave dhe vitin 1997. Sipas Vickers, libri ishte “dinamit” për klasën politike shqiptare, sepse ata kishin prova që Partia Demokratike organizoi vrasjen e Azem Hajdarit. Ky është pretendim i saj në intervistë.
Vickers tregon se ajo dhe kolegu i saj u interesuan edhe për çështjen çame dhe shkruan broshura, libra e artikuj për Çamërinë. Sipas saj, pas sulmeve të 11 shtatorit vëmendja e botës shkoi te Lindja e Mesme dhe Ballkani u harrua. “Nuk arrin në shtypin ndërkombëtar nëse nuk ka një tjetër kryengritje si ajo e ‘97-s”, tha ajo. Sipas saj, situata politike në rajon, sidomos në Kosovë dhe në Bosnjë, nuk është e qëndrueshme.
Vickers shprehu edhe mendimin e saj për Hashim Thaçin. Sipas saj, lufta guerile në Kosovë nuk ishte luftë konvencionale me një komandant të vetëm, por kishte disa komandantë dhe askush nuk kishte kontroll mbi gjithçka. “Nuk mund të fajësohet dikush për ato që ndodhën në territorin e një komandanti tjetër”, tha ajo, duke e quajtur të padrejtë gjykimin e tij si në një luftë konvencionale./dritare.net
