Rama nxjerr sërish tryezën e dialogut para Kryeministrisë, një ditë pasi protestuesit dogjën karriget
Sunday 25 October 2026, 08:08
Dritare.net
Kryeministri Edi Rama ka nxjerrë sërish sot para godinës së Kryeministrisë tryezën dhe karriget për dialog me protestuesit, pavarësisht refuzimit të tyre prej disa ditësh.
Ndryshe nga ditët e mëparshme, këtë herë janë vendosur karrige të modeleve të ndryshme, krahas stolave dhe tavolinës prej guri.
Një ditë më parë protestuesit dogjën karriget e vendosura në bulevard si simbol i ftesës së kryeministrit për dialog. Në orët e pasdites, protesta u përshkallëzua në akte dhune dhe kaos në disa zona të kryeqytetit.
Protestues të maskuar u vunë zjarrin Ministrisë së Mjedisit dhe Infrastrukturës dhe Teatrit të Kukullave, ndërsa sulmuan me bomba Molotov edhe Bashkinë e Tiranës. Sulme me gurë, fishekzjarrë, bomba Molotov dhe sende të forta u raportuan gjithashtu ndaj efektivëve të Policisë, bankave dhe bizneseve private.
Pas ngjarjeve të së shtunës, kryeministri Rama paralajmëroi se personat përgjegjës për aktet e dhunës do të përballen me pasoja penale dhe financiare./dritare.net
