Të dhunshëm nuk jemi ne, por sistemi që po na vret. Zbulohet në Itali, truri i “17 tetorit”
Saturday 24 October 2026, 16:04
Dritare.net
Një 30-vjeçar me origjinë palestineze, i identifikuar nga mediat si Youssef Siher, është vënë nën hetim nga policia italiane, nën dyshimin se qëndron pas faqes në Instagram “Lëvizja 17 Tetori”, e cila promovonte mobilizime dhe protesta kundër qeverisë.
Sipas raportimit të Tg1, i riu, i cili zyrtarisht banon në provincën e Breshias, u ndalua në Milano, ku qëndronte në banesën e një shoqeje. Ai u shoqërua në komisariat dhe aktualisht po hetohet për nxitje të kryerjes së veprave penale me rrethana rënduese.
Gjatë operacionit, autoritetet sekuestruan dhe kontrolluan banesën ku ndodhej i riu. Ndërkohë, në mëngjes, efektivët e Digos në Breshia kryen kontrolle edhe në një banesë në zonën mes Mazzanos dhe Gavardos, ku jeton ende familja e tij. Gjatë kontrollit, sipas raportimeve, u gjetën materiale informuese që mund të kenë interes për hetimin.
Sipas të dhënave të publikuara nga mediat italiane, 30-vjeçari është aktivist i lëvizjeve pro-palestineze dhe gazetar i pavarur, me bashkëpunime edhe me të përditshmen kombëtare italiane Il Fatto Quotidiano.
Ai ka një formim të lartë akademik, me studime në fushën e gjeopolitikës dhe një doktoraturë kërkimore.
Faqja që bëri thirrje për protesta të vazhdueshme
Profili “Lëvizja 17 Tetori” u krijua në Instagram në fillim të javës, pas protestave të zhvilluara gjatë fundjavës në Milano. Faqja synonte të organizonte dhe të orientonte pjesëmarrësit në protesta, duke publikuar udhëzime dhe këshilla për personat që dëshironin t'u bashkoheshin mobilizimeve.
Në përshkrimin e profilit, grupi prezantohej me sloganin: “Ne jemi ata të shesheve”, duke kundërshtuar akuzat për dhunë dhe duke e cilësuar sistemin politik si përgjegjës për situatën e krijuar.
“Të dhunshëm jeni ju, që na keni mohuar të ardhmen. Tani atë të ardhme do ta marrim vetë”, thuhej në një prej mesazheve të publikuara.
Në postimet e faqes njoftohej gjithashtu për një mobilizim të përhershëm çdo të shtunë, deri në rrëzimin e qeverisë, të cilën grupi e cilësonte si të korruptuar.
Faqja u bënte thirrje ndjekësve t'i bashkoheshin edhe një grupi në Telegram, përmes të cilit mund të shpërndaheshin informacione të mëtejshme rreth protestave.
Hetimet e autoriteteve italiane synojnë të sqarojnë rolin e të dyshuarit në administrimin e faqes dhe në përhapjen e mesazheve të saj.
Deri në përfundimin e procedurave gjyqësore, ndaj tij vlejnë prezumimi i pafajësisë dhe e drejta për t'u mbrojtur nga akuzat./L.F-dritare.net
Burimi: ilmessaggero.it
