Një kombinim i një diete mesdhetare me kalori të reduktuara, aktivitet fizik të përditshëm dhe mbështetje profesionale për t'u ushqyer ndihmoi njerëzit mbipeshë deri në obezë midis moshës 55 dhe 75 vjeç të shmangnin zhvillimin e diabetit të tipit 2, sipas një studimi të ri.
“Studimi ynë tregon se ndryshime modeste, por të qëndrueshme në dietë dhe stil jetese mund të parandalojnë miliona raste të diabetit të tipit 2 në mbarë botën,” tha bashkautori Dr. Frank Hu, profesor i ushqyerjes dhe epidemiologjisë në Shkollën e Shëndetit Publik Harvard T.H. Chan në Boston.
Rezultatet treguan se personat që reduktuan kaloritë ditore duke ndjekur dietën mesdhetare, kryenin ushtrime të moderuara çdo ditë dhe merrnin mbështetje profesionale për humbjen e peshës, kishin 31% më pak rrezik për të zhvilluar diabet të tipit 2 krahasuar me ata që ndoqën vetëm dietën mesdhetare.
Përfitimet kryesore të vërejtura
Ulje e yndyrës trupore, veçanërisht dhjamit abdominal.
Përmirësim i indeksit të masës trupore (BMI).
Ndryshime të qëndrueshme të stilit të jetesës për më shumë se 6 vjet.
“Rezultatet janë mbresëlënëse sepse zakonisht në studime të ngjashme njerëzit humbin motivimin pas një viti, por këtu pjesëmarrësit arritën të ruajnë ndryshimet në peshë dhe perimetër të belit për gjashtë vjet,” tha Christopher Gardner, profesor në Universitetin Stanford, i cili nuk ishte pjesë e studimit.
Ky kërkim është pjesë e një prove klinike 8-vjeçare në Spanjë, me mbi 6,800 pjesëmarrës me indeks të masës trupore nga 27 deri në 40. Asnjëri nuk kishte diabet në fillim, por të gjithë vuanin nga sindroma metabolike (presion i lartë i gjakut, nivel i lartë sheqeri, kolesterol i çrregullt dhe yndyrë e tepërt rreth belit).
Gjysma e pjesëmarrësve ndoqën dietë mesdhetare me reduktim prej 30% të kalorive ditore (rreth 600 kalori më pak në ditë), duke shmangur sheqernat e shtuara, bukët e rafinuara, mishrat e përpunuar dhe pijet e ëmbla. Rreth 35–40% e kalorive vinte nga yndyrnat e shëndetshme, 40–45% nga karbohidratet dhe 20% nga proteinat.
Çdo pjesëmarrës merrte falas një litër vaj ulliri ekstra të virgjër në muaj për të nxitur respektimin e dietës. Përveç kësaj, ata ushtronin 45 minuta në ditë, të paktën 6 ditë në javë, duke përfshirë ecje dhe ushtrime për forcë, fleksibilitet dhe ekuilibër.
Një pjesë thelbësore e suksesit ishte edhe mbështetja e vazhdueshme profesionale: dietologë të trajnuar u ofronin takime të rregullta individuale dhe në grup, si dhe telefonata për të ndihmuar në vetë-monitorim dhe vendosje qëllimesh.
Çfarë është dieta mesdhetare?
Dieta mesdhetare është më shumë një mënyrë të ushqyeri sesa një regjim i kufizuar. Ajo bazohet kryesisht në:
fruta dhe perime,
drithëra të plota, bishtajore dhe fara,
arra dhe vaj ulliri ekstra të virgjër si burimi kryesor i yndyrës.
Mishi i kuq konsumohet rrallë, ndërsa peshku i pasur me acide yndyrore omega-3, vezët, bulmeti dhe shpendët hahen në sasi më të vogla. Sheqernat dhe ushqimet e rafinuara ruhen për raste të veçanta.
Përveç ushqimit, dieta mesdhetare thekson edhe aspektin social – ngrënie me familjen e miqtë, lëvizje të ndërgjegjshme dhe aktivitet fizik të përditshëm./L.F-dritare.met
