Infektimi me Covid apo virozat e stinës, mjekja tregon si mund të mbrohen të gjithë grupmoshat!

Tashmë që jemi zyrtarisht në sezonin e vjeshtës dhe shkollat janë rihapur, po ashtu ditëve të fundit është parë edhe një shtim i rasteve me Covid-19, ku shumë persona kanë shfaqur simptoma si kohë, probleme me nuhatjen apo të tjera të ngjashme me të ftohtin.

Por çfarë duhet të bëjmë kur kemi këto simptoma a duhet të testohemi për Covid-19, grip dhe viruse të tjera? Çfarë mund të marrin për t'u ndjerë më mirë dhe kur duhet të kërkojnë ndihmë mjekësore? Dhe çfarë masash duhet të marrin në shkollë, punë dhe shtëpi?

Në një intervistë për CNN, mjekja Leana Wen ka treguar se çfarë duhet të bëjmë në lidhje me të gjithë pyetjet që kemi për shqetësimet tona!

Çfarë duhet të bëjnë njerëzit nëse shfaqin simptoma të ngjashme me të ftohtin?

Dr.Leana Wen: Infeksionet respiratore janë shumë të zakonshme, veçanërisht në dimër. Janë mbi 200 viruse që shkaktojnë ftohjen e zakonshme. Është vlerësuar se fëmijët kalojnë gjashtë periudha të sëmundjeve të frymëmarrjes çdo vit, ndërsa të rriturit zhvillojnë dy deri në katër episode. Simptomat e ngjashme me të ftohtin në përgjithësi largohen pa trajtim specifik. Çfarë duhet të bëjnë njerëzit nëse kanë këto simptoma varet nga kushtet e tyre mjekësore. Ka disa individë që janë shumë të cenueshëm ndaj rezultateve të rënda nga sëmundjet virale si Covid-19 dhe gripi. Këta individë duhet të marrin trajtim antiviral nëse rezultojnë pozitivë për të zvogëluar rrezikun e shtrimit në spital dhe vdekjes.

Unë do t'i bëj thirrje kujtdo që të bëjë një test në shtëpi për Covid-19 nëse zhvillon simptoma të ngjashme me të ftohtin nëse janë 65 vjeç e lart ose kanë sëmundje serioze para-ekzistuese që prekin zemrën dhe mushkëritë. Këta individë duhet gjithashtu të marrin në konsideratë testimin për grip, veçanërisht nëse kanë ethe dhe dhimbje trupi.

Çfarë masash duhet të marrin njerëzit me simptoma të ngjashme me të ftohtin në shkollë, punë dhe shtëpi?

Wen: Le të marrim secilën nga këto situata veç e veç. Shkollat ​​në përgjithësi kanë politika rreth sëmundjeve të tilla. Shumica nuk i lejojnë fëmijët të kthehen në shkollë nëse kanë ethe ose simptoma të rënda virale si të vjella. Disa kërkojnë shënimin e mjekut dhe mund të ketë edhe kërkesa për testim.

Vendet e punës mund të kenë gjithashtu këto protokolle. Kur keni dyshime, qëndroni në shtëpi kur keni ethe dhe simptoma aktive ose të reja. Nëse duhet të ktheheni në punë, vendosni maskë për të parandaluar infektimin e të tjerëve.

Lidhur me masat që duhet të marrim në shtëpi varet nga cenueshmëria e atyre që jetojnë me ju. Nëse të gjithë janë përgjithësisht të shëndetshëm, nuk është e paarsyeshme të bëni atë që keni bërë përpara Covid-19. Nga ana tjetër, nëse dikush në familje është shumë i cenueshëm, përshembull të moshuarit me sëmundje të rëndë të mushkërive, atëherë ai nuk duhet të jetë në të njëjtën dhomë me individin e sëmurë.

Çfarë mund të marrin njerëzit për t'u ndjerë më mirë?

Wen: Nëse dikush ka Covid-19 ose grip dhe ka të drejtë për antivirale, ata duhet t'i marrin ato herët në rrjedhën e sëmundjes së tyre. Përndryshe, është trajtim simptomatik. Kjo do të thotë të pini shumë lëngje për të qenë të hidratuar dhe për të pushuar shumë. Nëse dikush zhvillon ethe ose dhimbje muskujsh, ai mund të marrë Tylenol ose ibuprofen. Medikamente të tjera pa recetë mund të ofrojnë një lehtësim edhe për simptoma specifike, të tilla si bllokimi i hundës dhe kolla.

CNN: Së fundi, a mund të na thoni se si njerëzit duhet ta mbrojnë veten nga viruset?

Wen: Dua të nënvizoj se infeksionet virale janë jashtëzakonisht të zakonshme dhe të vështira për t'u shmangur. Megjithatë, ka hapa që njerëzit mund të ndërmarrin për të zvogëluar mundësinë e tyre të infektimit. Këto hapa përfshijnë larjen e kujdesshme të duarve. Viruset mund të transmetohen përmes sipërfaqeve me prekje të lartë. Njerëzit që janë jashtë duhet të lajnë duart ose të përdorin dezinfektues duarsh përpara se të prekin fytyrën ose të hanë.

Në varësi të asaj se sa e rëndësishme është shmangia e infeksioneve virale, individët mund të ndërmarrin hapa shtesë, duke përfshirë shmangien e hapësirave të mbushura me njerëz. Por edhe kryerjen e vaksinave të reja mbi Covid-19, duke përfshirë edhe atë kundër gripit./M.K-dritare.net