Trump mbërrin në Pekin për vizitën dyditore. Foto nga pritja zyrtare
E Mërkurë 13 Maj 2026, 14:02
Dritare.net
Presidenti amerikan Donald Trump ka mbërritur në Pekin për një vizitë dyditore me rëndësi të lartë diplomatike, ku do të zhvillojë bisedime me presidentin kinez Xi Jinping mbi ekonominë, teknologjinë dhe tensionet gjeopolitike globale.
Trump u prit në Beijing Capital International Airport me ceremoni zyrtare, bandë ushtarake dhe tapet të kuq, ndërsa në pistë ndodheshin të rinj kinezë që valëvitnin flamujt e SHBA-së dhe Kinës.
Në aeroport, presidenti amerikan u prit nga zëvendëspresidenti kinez Han Zheng, një lëvizje që analistët e interpretojnë si shenjë respekti nga Pekini ndaj Trump.
Gjatë vizitës së tij të parë në vitin 2017, Kina kishte dërguar një zyrtar të nivelit më të ulët për pritjen.
Delegacioni amerikan përfshin disa nga emrat më të njohur të biznesit dhe teknologjisë amerikane, mes tyre Elon Musk, Tim Cook, Jensen Huang dhe Larry Fink.
Para nisjes për në Kinë, Trump deklaroi se një nga kërkesat e tij kryesore ndaj Xi Jinping do të jetë “hapja” më e madhe e ekonomisë kineze për kompanitë amerikane të teknologjisë dhe industrisë.
“Do t’i kërkoj Presidentit Xi të hapë Kinën që këta njerëz brilantë të mund të punojnë dhe të ndihmojnë zhvillimin e vendit”, shkroi Trump në rrjetet sociale.
Vizita zhvillohet në një moment tensionesh të larta ndërkombëtare, përfshirë krizën me Iranin dhe situatën në Ngushticën e Hormuzit. Trump deklaroi para gazetarëve se do të zhvillojë një “bisedë të gjatë” me Xi Jinping edhe për Iranin, por shtoi se SHBA “nuk ka nevojë për ndihmën e askujt” në këtë çështje.
Presidenti amerikan e cilësoi vizitën në Pekin si “shumë emocionuese”, duke shtuar se pret “shumë gjëra të mira” nga takimet me udhëheqjen kineze./L.F-dritare.net
