Tronditet qeveria e Starmer. Dorëheqje nëpër ministri, 60 deputetë kërkojnë largimin e tij
E Hënë 11 Maj 2026, 21:09
Dritare.net
Katër ndihmës të ministrave të qeverisë britanike kanë dhënë dorëheqje, ndërsa presioni ndaj kryeministrit Keir Starmer po rritet ndjeshëm brenda Partisë Laburiste, ku tashmë 60 deputetë kërkojnë publikisht dorëheqjen e tij ose vendosjen e një afati për largim.
Së fundmi, deputetja laburiste Melanie Ward dha dorëheqjen nga posti i saj si ndihmëse e zëvendëskryeministrit David Lammy. Në një deklaratë në rrjetin “X”, ajo tha se Starmer ka bërë “punë të rëndësishme” si kryeministër, por shtoi se mesazhi i zgjedhjeve të fundit është i qartë dhe se ai “nuk gëzon më besimin e publikut për të udhëhequr ndryshimin e nevojshëm”.
Ward bëri thirrje për dorëheqjen e Starmer dhe për një “proces të shpejtë” për zgjedhjen e një pasardhësi.
Ndërkohë, sipas përllogaritjeve të BBC-së, numri i deputetëve laburistë që kanë kërkuar publikisht largimin e kryeministrit ka arritur në 60, duke e thelluar krizën brenda partisë pas rezultateve të dobëta në zgjedhjet e fundit.
Starmer deri tani ka refuzuar thirrjet për dorëheqje, ndërsa tensionet brenda Laburistëve vijojnë të rriten./K.C/dritare.net
