Producenti dhe ekzekutivi legjendar i industrisë muzikore, Clive Davis, ka ndërruar jetë në moshën 94-vjeçare. Lajmi u konfirmua nga familja e tij përmes një postimi në rrjetet sociale.
Davis njihej si një nga figurat më me ndikim në historinë e muzikës moderne, i quajtur shpesh si “njeriu me veshët e artë”, për aftësinë e tij të rrallë në zbulimin e talenteve që më pas u shndërruan në ikona botërore.
Gjatë karrierës së tij, ai ishte përgjegjës për promovimin dhe ngritjen e disa prej emrave më të mëdhenj të muzikës, përfshirë Janis Joplin, Whitney Houston, Billy Joel dhe Santana.
I lindur në Brooklyn, Davis fillimisht nuk e kishte plan karrierën në muzikë. Pas humbjes së prindërve në adoleshencë, ai u diplomua në Harvard Law School dhe punoi si avokat, përpara se të hynte në Columbia Records në vitin 1960. Vetëm pak vite më vonë, ai u bë president i kompanisë diskografike.
Një nga zbulimet e tij më të mëdha ishte Janis Joplin, të cilën e pa për herë të parë në Monterey Pop Festival në vitin 1967. Davis e përshkruante atë si një artiste me energji të jashtëzakonshme skenike dhe një zë që kishte ndikim emocional të rrallë.
Me vdekjen e tij, bota e muzikës humbet një nga figurat më me ndikim të shekullit të kaluar, i cili formësoi shijen muzikore të miliona njerëzve në mbarë botën./dritare.net
