Pse Thethi e jo Jugu. Rama: Aksioni vazhdon nga Veriu në Jug!
E Shtunë 30 Gusht 2025, 10:10
Dritare.net
Kryeministri Edi Rama ka reaguar sot përmes një postimi në rrjetet sociale, duke theksuar se operacionet për mbrojtjen e territorit nga ndërhyrjet dhe abuzimet vijojnë në të gjithë vendin, nga Veriu në Jug e deri në Shqipërinë e Mesme.
Shefi i qeverisë nënvizoi se në Durrës, konkretisht në Kepin e Rodonit, është vendosur rendi ligjor mbi një territor të marrë peng nga një abuzues. Ky i fundit është ndaluar nga Policia e Shtetit dhe i është dorëzuar drejtësisë, ndërsa rezulton të ketë qenë edhe ish-drejtues i inspektorëve të Durrësit.
Rama iu përgjigj kritikave të ngritura në nisje të këtij aksioni mbi zgjedhjen e zonave të verifikimit, duke theksuar se puna e strukturave shtetërore po vijon paralelisht në Theth, Jug dhe Shqipërinë e Mesme.
“Ca zëra në nisje të kësaj kthese të re thoshin “po pse Thethi e jo Jugu, po pse ashtu e jo kështu”, ndërkohë puna për mbrojtjen e vendit nga abuzuesit vazhdon në Veri, Jug dhe Shqipërinë e Mesme, ku konkretisht në Durrës është vendosur rendi ligjor mbi një territor të marrë peng nga një abuzues, i cili është ndaluar nga Policia e Shtetit e i është dorëzuar drejtësisë edhe si ish-drejtues i inspektorëve të Durrësit. Kudo ku abuzohet me territorin do të vendoset rendi ligjor,” – shkruan kryeministri./L.F-dritare.net
View this post on Instagram
