Kadri Veseli në Hagë: Gjykata duhet të mbrojë të vërtetën. I kam shërbyer vendit tim
E Mërkurë 18 Shkurt 2026, 14:02
Dritare.net
Kadri Veseli foli në seancën e fundit të deklaratave përmbyllëse në Hagë. Ai tha se gjykata duhet të mbrojë të vërtetën dhe pafajësinë. Vesei tha se nuk e ka humbur kurrë besimin te liria dhe e drejta.
“Në fund të gjykimit tim po ju drejtohem për të theksuar një pikë të vetme por të jashtëzakonshme prej rëndësie. Gjykata duhet me çdo kusht të mbrojë të vërtetën dhe paanësinë. Është trashëgimia që do të mbetet prej saj. Ky është shkaku pse iu bashkova grave e burrave që u rreshtuan për lirinë e Kosovës dhe i kam shërbyer vendit tim që të gjithë ta njohin të vërtetën. Në momentet më të errëta s’e humba kurrë besimin se liria dhe e drejta do të triumfonin. Populli i Kosovës kishte të drejtën e patjetërsueshme për të jetuar me liri e dinjitet. Kam besuar se vuajtjet do të merrnin fund. Nuk kam besuar kurrë se dhuna, urrejtja e hakmarrja mund të jenë udhërrëfyes. Liria s’mund të arrihet përmes padrejtësisë. Paqja s’mund të ndërtohet mbi krim. Ky s’ka qenë parim teorik, por bindje morale që ka udhëhequr çdo veprim timin”, tha Veseli.
Veseli përshkroi para gjykatës në Hagë frikën dhe persekutimin prej Serbisë kundrejt familjes dhe popullit të Kosovës.
“Familja ime dhe unë kemi jetuar nën persekutim të vazhdueshëm. Kjo ka prekur secilin anëtar të saj, por edhe popullin tim. Burrat, gratë, fëmijët përballeshin çdo ditë me padrejtësi e frikë. E di ç’do të thotë të jetosh i pambrojtur dhe nën kërcënim të vazhdueshëm. Nuk ia uroj askujt”, tha Veseli./L.F-dritare.net
