Historia e 7-vjeçarit, Leotrim Ahmeti të vrarë gjatë luftës në Kosovë
E Martë 18 Qershor 2024, 21:09
Dritare.net
Në Ditën e Çlirimit të Skenderajt u zbulua skulptura e 7-vjeçarit të vrarë gjatë luftës në Kosovë. Leotrim Ahmeti, 7 vjeç vdiq më 11 shtator 1998 në spitalin ushtarak në Gradicë të Drenasit, ku edhe u varros.
Në zbulimin e skulpturës ishte sot edhe nëna e Loetrimit e cila pak kohë më parë tregoi në një intervistë historinë e të birit.
Leotrimi i vogël u dëmtua rëndë pasi shpërtheu granata e forcave serbe në oborrin e shtëpisë së tyre dhe copat e saj ranë mbi fëmijët e nënës Shukrie Ahmeti, nga Rrezalla e Skenderajt, gruas së Malushit, dëshmorit të Kosovës.
““Granata ka rënë në oborr, një granatë e ka rrok djalin në bark, çika (fatmirja), duke më thënë hajde nanë dalim, goditet nga granata në të dyja këmbët dhe ende i ka copëzat e granatës në këmbë, një vajzë pesë vjeçare e familjes së gjerë, Vjollca, ka vdekur në oborrin tonë, pasi i ka ra granata. Një granatë tjetër ka rënë në oborrin e kunatit dhe djalit të kunatit ia ka dëmtuar fytyrën”, tha ajo në një intervistë para disa kohësh.
Nënë Shukrija thotë se ende i ka të freskëta britmat e djalit prej dhimbjes së çarjes së barkut.
“Isha në një situatë që nuk dija çfarë të bëja, në njërën anë djali me barkun e çarë, në anën tjetër vajza, e cila nuk mund të ecte dhe në anën tjetër djali i kunatit me dëmtime të rënda në fytyrë dhe me pjesën e nofullës së hequr. Nuk e di kush na ka marrë dhe larguar. Rrugës duke u larguar më mbetën djemtë e tjerë dhe koka më mbeti pas. Leotrimi më ka thirrë: ‘Oj nanë, kqyr se edhe unë kam diçka në bark, jam sëmut prej barku’, kur ja kam hjek teshat ia kam parë se ju kish qky barku dhe i kishin ra zorrët, ja kam qit xhemperin me ia mbulu, më ka thënë ‘ma nanë, mos um prek, se po më dhem shumë’”, thotë nënë Shukrija.
Në Gradice pas dhënies së ndihmës mjekesore, djali nuk arriti të jetonte më shumë se tri orë. Tetë muaj pas vrasjes së Leotrimit, në vijën e parë të frontit të luftës, heroikisht ra edhe babai i tij, komandant Malush Ahmeti./K.C/dritare.net
