Gjergji Teneqexhiut, ish-ambasadorit tonë në Japoni, i jepet dekorata e lartë
E Martë 15 Korrik 2025, 15:03
Dritare.net
Në një ceremoni të veçantë të organizuar nga Ambasada Japoneze në Tiranë, Gjergji Teneqexhiu është nderuar me dekoratën prestigjioze “Urdhri i Diellit në Lindje, Yll Artë dhe i Argjendtë” (Order of the Rising Sun, Gold and Silver Star), një nga vlerësimet më të larta që jepet nga Qeveria e Japonisë.
Dekorata iu dorëzua nga Ambasadorja e Japonisë në Shqipëri, SH.S. znj. Kato, në shenjë mirënjohjeje për kontributin e Teneqexhiut në forcimin e marrëdhënieve dypalëshe midis Japonisë dhe Shqipërisë. Në fjalën e tij gjatë ceremonisë, Teneqexhiu e pranoi këtë nderim me përulësi, duke theksuar se çmimi pasqyron jo vetëm përpjekjet personale, por edhe zhvillimin e qëndrueshëm të bashkëpunimit mes dy vendeve.
“Ky vlerësim ka një rëndësi të madhe për mua personalisht, për familjen time, miqtë dhe për marrëdhëniet miqësore Shqipëri–Japoni,” – u shpreh ai. Zoti Teneqexhiu shprehu mirënjohje të veçantë ndaj Madhërisë së Tij, Perandorit të Japonisë, për këtë nder të jashtëzakonshëm.
Dekorata “Order of the Rising Sun” jepet nga qeveria japoneze që nga viti 1875 dhe i dedikohet individëve që kanë dhënë kontribut të shquar në promovimin e marrëdhënieve ndërkombëtare, kulturës dhe bashkëpunimit ndërkombëtar./L.F-dritare.net
