Llotaria amerikane: "Sot u mërzita më pak se në maj"
E Enjte 8 Shtator 2016, 22:10
Dritare.net
Ata kanë nxituar të shikojnë rezultatet nëpërmjet sajtit në internet duke shpresuar se kësaj here ëndrra amerikane mund të bëhet realitet.
Sara R, një nga aplikueset e përvitshme të lotarisë thotë për dritare.net se edhe në këtë mundësi të dytë mori një përgjigje negative:
“U gëzova shumë sapo më dhanë lajmin për një listë të re fituesish, shkova me vrap në një internet kafe për të parë përgjigjen e statusit tim, por për fat të keq nuk isha fituese. U mërzita pak, por jo aq sa në maj të them të drejtën sepse ndryshe nga hera e parë që e prita për muaj të tërë përgjigjen, sot ishte një shpresë që u ndez dhe u fik brenda pak minutash”.
Në minutat e para pas nxjerrjes së njoftimit, serveri duket se pati ngarkesë duke qenë se kërkonte më shumë kohë për tu hapur.
Ilda H, një tjetër aplikuese e këtij viti thotë se u zhgënjye përsëri nga përgjigjja:
“Sapo pashë në Facebook lajmërimin për një fitues të rinj, nxitova të hapja faqen për ta kontrolluar. Isha pothuajse e sigurt që këtë herë do ta fitoja, por rezultati ishte përsëri njësoj: Nuk isha përzgjedhur. Megjithatë nuk i humbas shpresat. Ishalla fitoj vitin që vjen”.
Nuk dihet me saktësi se sa aplikantë të rinj kanë përfituar nga kjo mundësi e dytë, ndërkohë që aplikuesit e për këtë vit ishin afërsisht 200 mijë.
Pritet që lotaria e re amerikane të hapet si çdo vit nga data 1 tetor deri në 3 nëntor, ndonëse për këtë nuk ka ende lajmërim nga Ambasada Amerikane në Tiranë. / dritare.net
