Vrau nënë e bijë, Marjan Rroku kërkon sërish lirinë. Ja vendimi i Gjykatës!

Marjan Rroku, i dënuar me burgim të përjetshëm për vrasjen e Alda Canajt dhe nënës së saj Mbarimes, ka kërkuar sërish në Gjykatë, për të dalë në liri. Pasi iu refuzua kërkesa për rigjykim të çështjes, studenti i fizikës bërthamore bëri kërkesën e radhës në Gjykatën e Tiranës, duke këmbëngulur për të dalë në liri, me arsyetimin se vendimi i shkallës së parë, është i pavlefshëm, pasi nuk përmban firmat e tre anëtarëve të trupit gjykues që kanë shqyrtuar çështjen penale ndaj tij.

Për më shumë se 40 minuta, Rroku paraqiti para gjykatës arsyet e pavlefshmërisë së vendimit dhe për rrjedhojë edhe të urdhrit të ekzekutimit që e mban prapa hekurave. Në sy binte fakti, se Marjan Rroku kishte zgjedhur të mbrohej vetë para gjykatës dhe nuk kishte marrë avokat. Rroku i tha gjykatës se e kupton sa e vështirë është për një gjykatës të vendosë për një të dënuar me burgim të përjetshëm, në një shoqëri paragjykuese, por teksa kërkonte lirinë citoi shprehjen: “Drejtësia të vihet në vend, pa qielli lë të çahet”, shkruan "BW".

Prokurori Hysen Keta, tha se kërkesa e Marjan Rrokut duhet të rrëzohet si e pabazuar në prova dhe ligj. Edhe gjykatësi Gerd Hoxha, në përfundim të gjykimit e rrëzoi kërkesën e ish­shikasit, si të pabazuar dhe i shpjegoj të dënuarit me burgim të perjetshëm, se kërkesa e tij është bërë jashtë çdo afati.