Videot intime të personazheve publike në rrjet, reagon Policia!
Wednesday 30 September 2026, 21:09
Dritare.net
Publikimi dhe shpërndarja e videove me përmbajtje intime në portale dhe platforma online ka vënë në lëvizje Policinë e Tiranës. Materialet procedurale i janë referuar Prokurorisë për katër vepra penale, ndërsa specialistët e Krimeve Kibernetike po punojnë për identifikimin e faqeve dhe profileve që i kanë publikuar apo shpërndarë. Paralelisht, kanë nisur procedurat për heqjen e këtyre materialeve nga platformat online.
Njoftimi i Policisë:
Tiranë-Drejtoria Vendore e Policisë Tiranë ka nisur hetimet kryesisht, pas konstatimit të publikimit dhe shpërndarjes në disa portale dhe platforma online të materialeve filmike me përmbajtje intime.
Sektori për Hetimin e Krimeve Kibernetike po kryen veprime hetimore me qëllim identifikimin e adresave IP, dhe të dhënave të tjera të faqeve dhe profileve që kanë publikuar apo shpërndarë këto materiale, si dhe po ndërmerr procedurat për heqjen e tyre nga platformat ku janë publikuar.
Materialet procedurale i janë referuar Prokurorisë për veprat penale “Përgjimi i paligjshëm i të dhënave kompjuterike”, “Ndërhyrja në të dhënat kompjuterike”, “Ndërhyrja e padrejtë në jetën private” dhe “Keqpërdorimi i pajisjeve”.", thuhet në njoftimin e policisë./K.C/dritare.net
