Trump ndryshon fshehurazi avionin pas samitit të NATO-s, dyshohet për kërcënim iranian
Wednesday 12 August 2026, 10:10
Dritare.net
Presidenti amerikan Donald Trump ka konfirmuar se ndryshoi në mënyrë sekrete avionin me të cilin po largohej nga Turqia, pas samitit të NATO-s muajin e kaluar, për shkak të një kërcënimi të mundshëm ndaj tij.
Trump tha se Shërbimi Sekret dhe ushtria amerikane i kërkuan të udhëtonte me një avion tjetër.
“Unë ndjek udhëzimet e Shërbimit Sekret dhe ushtrisë. Ata donin që të merrja një fluturim tjetër, një avion tjetër”, u shpreh Trump.
Sipas raportimeve, më 8 korrik Trump ishte parë duke hipur në Air Force One në aeroportin e Ankarasë, në prani të kamerave televizive. Por më pas, në kuadër të një operacioni të fshehtë sigurie, ai u largua nga avioni përmes një kamioni furnizimi dhe u transportua drejt një avioni tjetër ushtarak, një C-32A, i cili përdoret zakonisht edhe nga nënpresidenti amerikan.
Sipas zyrtarëve amerikanë të cituar nga CBS News, SHBA-ja kishte zbuluar një kërcënim të besueshëm iranian për të lëshuar një raketë drejt avionit. The New York Times raportoi gjithashtu se inteligjenca amerikane kishte marrë informacion për një person pranë samitit të NATO-s, i cili ishte parë me një raketë të lëshuar nga supi.
Gazetarët nuk e dinin se Trump ishte larguar
Ndërsa Trump u transportua në mënyrë të fshehtë drejt avionit C-32A, gazetarët dhe disa anëtarë të stafit të Shtëpisë së Bardhë që ndodheshin në Air Force One nuk ishin në dijeni se presidenti nuk ndodhej më në bord.
Sipas raportimeve, gazetarëve iu kërkua të mbanin të mbyllura grilat e dritareve gjatë fluturimit. Një fotograf që hapi për pak kohë një perde u udhëzua menjëherë ta mbyllte atë.
Avioni që transportonte Trump përdori shenjën e thirrjes “Reach 18”, ndërsa avioni ku ndodheshin gazetarët vazhdoi të përdorte shenjën “AF1”, duke ruajtur përshtypjen se presidenti ishte ende në bordin e Air Force One.
Në avionin fillestar, sipas raportimeve, mbetën disa anëtarë të kabinetit të Trump, përfshirë Sekretarin e Shtetit Marco Rubio dhe Sekretarin e Thesarit Scott Bessent.
Trump: “Kam shumë kërcënime”
Duke folur për incidentin, Trump tha se nuk kishte kërkuar shumë detaje rreth kërcënimit.
“Me sa duket kishte një kërcënim atje”, tha ai, duke shtuar se merr vazhdimisht kërcënime.
Trump ka deklaruar më herët se gjatë samitit në Turqi ishte “objektivi numër një” i Iranit. Ndërkohë, Komiteti për Mbrojtjen e Gazetarëve kritikoi faktin që gazetarët nuk ishin informuar për kërcënimin e mundshëm. Organizata tha se administrata amerikane ka përgjegjësinë të sigurojë që gazetarët që udhëtojnë me presidentin të mos ekspozohen në mënyrë të panevojshme ndaj rrezikut.
